சமூக வலைதளங்களில் லைக்ஸ் வாங்குவதற்காக மக்கள் எந்த எல்லைக்கும் செல்வார்கள் என்பதற்குச் சாட்சியாக ஒரு அதிர வைக்கும் வீடியோ இணையதளத்தில் பரவி வருகிறது. அந்த வீடியோவில், நீல நிற சேலை அணிந்த பெண் ஒருவர் தனது வீட்டின் மொட்டை மாடியில் மிகவும் ஆபத்தான முறையில் நடனமாடுகிறார். இரண்டு கட்டிடங்களின் சுவர்களுக்கு இடையே தனது கால்களை வைத்து, அந்தரத்தில் நின்றபடி அவர் ஆடும் நடனம் பார்ப்பவர்களை நெஞ்சடைக்க வைக்கிறது. ஒரு சிறு தவறு நடந்தாலும் உயிர் போகும் நிலை தெரிந்தும், கேமராவுக்கு முன்னால் அவர் காட்டும் அந்த அதீத துணிச்சல் பெரும் விவாதத்தை ஏற்படுத்தியுள்ளது.
வீடியோவின் இறுதியில் அந்தப் பெண் நிலைதடுமாறி விழுவது போலக் காட்சிகள் திடீரென முடிவடைகின்றன. அவர் கீழே விழுந்தாரா அல்லது காயமின்றித் தப்பினாரா என்பது தெரியாத நிலையில், நெட்டிசன்கள் பலரும் தங்களது கவலைகளையும் கண்டனங்களையும் தெரிவித்து வருகின்றனர். “சில நொடிப் புகழுக்காக இப்படி உயிரைப் பணயம் வைப்பதா?” என்று பலரும் கேள்வி எழுப்பி வருகின்றனர். வைரல் ஆவதை விடத் தனது பாதுகாப்பு முக்கியம் என்பதை மறந்து செயல்படும் இதுபோன்ற நபர்களின் செயல், சமூக வலைதள மோகம் எந்த அளவுக்கு ஆபத்தானது என்பதை மீண்டும் ஒருமுறை உணர்த்தியுள்ளது.
