தமிழக முதல்வராக விஜய் பதவியேற்ற விழாவில், அவருக்குப் பின்னால் நின்றிருந்த ஒரு போலீஸ் அதிகாரி சமூக வலைதளங்களில் மிகப்பெரிய விவாதப் பொருளாக மாறினார். அவர் பார்ப்பதற்கு அப்படியே சென்னை சூப்பர் கிங்ஸ் அணியின் வேகப்பந்து வீச்சாளர் அன்ஷுல் கம்போஜ் போலவே இருந்ததால், ரசிகர்கள் குழப்பமடைந்தனர். “ஐபிஎல் விளையாட வேண்டிய கம்போஜ் இங்கே என்ன செய்கிறார்?” என்று மீம்கள் பறந்தன. இந்த வைரல் விவாதத்திற்கு முற்றுப்புள்ளி வைக்கும் விதமாக, சிஎஸ்கே நிர்வாகம் அந்தப் போலீஸ் அதிகாரியை நேரில் அழைத்து அன்ஷுல் கம்போஜைச் சந்திக்க வைத்து ஒரு மாஸ் வீடியோவை வெளியிட்டுள்ளது.

​சேப்பாக்கம் மைதானத்தில் நடந்த இந்தச் சந்திப்பில், கம்போஜ் தனது ‘டூப்ளிகேட்’ அதிகாரியுடன் கைகுலுக்கி உரையாடினார். ஐபிஎல் 2026 தொடரில் கம்போஜ் 11 போட்டிகளில் 19 விக்கெட்டுகளை வீழ்த்தி பர்பிள் கேப் ரேஸில் மிரட்டி வரும் வேளையில், இந்தச் சந்திப்பு ரசிகர்களுக்குப் பெரும் ஆச்சரியத்தைக் கொடுத்துள்ளது. தற்போது புள்ளிப்பட்டியலில் 12 புள்ளிகளுடன் 5-வது இடத்தில் இருக்கும் சிஎஸ்கே அணி, பிளே-ஆஃப் சுற்றுக்கு முன்னேறத் துடிக்கும் நிலையில், இந்த வீடியோ இணையத்தில் தீயாய் பரவி வருகிறது.