அரசு மீதான விமர்சனங்கள் மற்றும் பெண்கள் பாதுகாப்பு குறித்த தனது முந்தைய பேச்சுக்குத் தேமுதிக பொதுச்செயலாளர் பிரேமலதா விஜயகாந்த் தற்போது மிகத் தெளிவான விளக்கத்தை அளித்துள்ளார். ஒரு பெண்ணாகவும், ஒரு சகோதரியாகவும் தனக்கு இருக்கும் உரிமையோடு, அரசு மீது ஏதேனும் விமர்சனங்கள் வரும்போது அதை அண்ணன் ஸ்டாலினிடம் நேரடியாக எடுத்துச் சொல்வேன் என்று அவர் நெகிழ்ச்சியுடன் குறிப்பிட்டார். எந்தவொரு பிரச்சனையாக இருந்தாலும் அவரிடம் உரிமையோடு பேச முடியும் என்றும், அவர் உடனடியாக அதற்கான தீர்வுகளை (Solution) வழங்கி தங்களை அரவணைத்துச் செல்வார் என்றும் பிரேமலதா தெரிவித்தார்.

​மேலும், இரண்டாவது முறையாக ஸ்டாலின் அவர்கள் முதலமைச்சராகப் பொறுப்பேற்கும்போது, 100% மிகச் சிறந்த மற்றும் பாதுகாப்பான ஆட்சியைத் தமிழ்நாட்டிற்கு வழங்குவார் எனத் தான் உறுதியாக நம்புவதாக அவர் கூறினார். இந்தக் கூட்டணியை அவர் மிகச் சிறப்பாக வழிநடத்திச் செல்வார் என்பதில் தங்களுக்கு முழு நம்பிக்கை இருப்பதாகக் குறிப்பிட்ட பிரேமலதாவின் இந்தப் பேச்சு, அரசியல் களத்தில் நிலவி வந்த யூகங்களுக்கு முற்றுப்புள்ளி வைக்கும் வகையில் அமைந்துள்ளது.