தமிழக தேர்தல் களம் சூடுபிடித்துள்ள நிலையில், விடுதலைச் சிறுத்தைகள் கட்சித் தலைவர் திருமாவளவன் அதிமுக மற்றும் பாமக கட்சிகளை மிகக் கடுமையாக விமர்சித்துப் பேசியுள்ளார். தேர்தல் பரப்புரையில் பேசிய அவர், அதிமுக-வின் இரட்டை இலை சின்னம் தற்போது அந்தக் கட்சிக்குச் சொந்தமானது கிடையாது என்றும், அது பாரதிய ஜனதா கட்சியின் மற்றொரு சின்னமாகவே மாறிவிட்டதாகவும் பகிரங்கமாகச் சாடினார். தமிழகத்தில் பாஜக நேரடியாக நுழைய முடியாததால், பாமக மற்றும் அதிமுக ஆகிய கட்சிகளைத் தனது நிழலாகப் பயன்படுத்தி வருவதாக அவர் குற்றம் சாட்டினார்.

மோடியின் அரசியலுக்குத் துணைபோகும் இந்தச் சின்னங்களுக்கு வாக்களிப்பது, மதவாத சக்திகளைத் தமிழ்நாட்டிற்குள் நுழைய அனுமதிப்பதற்குச் சமம் என்று எச்சரித்த அவர், மாற்றுக் கட்சிகள் என்ற போர்வையில் பாஜக-வின் முகவர்களாகச் செயல்படுபவர்களை மக்கள் அடையாளம் கண்டு புறக்கணிக்க வேண்டும் என ஆவேசமாக முழங்கினார். திருமாவளவனின் இந்தப் பேச்சு தற்போது அரசியல் வட்டாரத்தில் பெரும் விவாதத்தைக் கிளப்பியுள்ளது.