தமிழக சட்டமன்றத் தேர்தல் களம் 2026-ஐ நோக்கி அனல் பறந்து வரும் வேளையில், சேலம் மாவட்டம் எடப்பாடி தொகுதியில் நடிகர் விஜய்யின் தமிழக வெற்றிக் கழகம் போட்டியிடப் போவதில்லை என்ற தகவல் அரசியல் வட்டாரத்தில் பெரும் விவாதத்தைக் கிளப்பியுள்ளது.

அதிமுக பொதுச்செயலாளர் எடப்பாடி பழனிசாமியின் சொந்தத் தொகுதியான இங்கே, தவெக சார்பில் வேட்பாளர்கள் யாரும் நிறுத்தப்பட மாட்டார்கள் எனத் தெரிகிறது.

கட்சியின் 234 தொகுதிகளுக்கான உத்தேசப் பட்டியலில் எடப்பாடி தொகுதி மட்டும் விடுபட்டுள்ளது அல்லது அங்கு வேட்பாளரை நிறுத்தாமல் அதிமுகவிற்கு மறைமுக ஆதரவு அளிக்க விஜய் திட்டமிட்டுள்ளாரா என்ற கேள்வியும் எழுந்துள்ளது.

ஏற்கனவே திமுகவை வீழ்த்துவதே இலக்கு என முழங்கி வரும் விஜய், எடப்பாடி தொகுதியில் பலமான வேட்பாளரை நிறுத்தினால் அது அதிமுகவின் வெற்றியைப் பாதிக்கக்கூடும் என்பதால் இந்த வியூகத்தை எடுத்திருப்பதாகக் கூறப்படுகிறது.

இருப்பினும், இது தவெக-வின் அதிகாரப்பூர்வ முடிவா அல்லது கடைசி நேரத்தில் வேட்பாளர் அறிவிக்கப்படுவாரா என்பதை அறிய தொண்டர்கள் ஆவலுடன் காத்திருக்கின்றனர்.

எடப்பாடி தொகுதியில் தவெக போட்டியிடவில்லை என்றால், அது அதிமுக-தவெக இடையிலான ஒரு ரகசிய உடன்படிக்கையையே காட்டுவதாக அரசியல் விமர்சகர்கள் கருத்து தெரிவித்து வருகின்றனர்.