தமிழகத்தில் வரும் 2026ம் ஆண்டு நடைபெற உள்ள சட்டசபை தேர்தலை முன்னிட்டு திமுக தலைமையில் 26 கட்சிகள் கொண்ட பிரம்மாண்ட கூட்டணி அமைக்கப்பட்டுள்ளது. கடந்த 2021ம் ஆண்டு தேர்தலில் 13 கட்சிகளுடன் களம் கண்ட திமுக இந்த முறை தேமுதிக மற்றும் மக்கள் நீதி மய்யம் உள்ளிட்ட கூடுதல் கட்சிகளைத் தனது கூட்டணியில் இணைத்துள்ளது.

கடந்த முறை உதயசூரியன் சின்னத்தில் மொத்தம் 188 வேட்பாளர்கள் போட்டியிட்ட நிலையில் இந்த முறை புதிய கூட்டணிக் கட்சிகளுக்கும் இட ஒதுக்கீடு செய்ய வேண்டிய கட்டாயம் திமுக தலைமைக்கு ஏற்பட்டுள்ளது. இதனால் பழைய கூட்டணிக் கட்சிகளுக்குத் தொகுதிகளின் எண்ணிக்கை குறைக்கப்படலாம் என்ற தகவல் வெளியாகியுள்ளது அக்கட்சிகளிடையே பெரும் அதிர்ச்சியை ஏற்படுத்தியுள்ளது.

தொகுதிப் பங்கீட்டு பேச்சுவார்த்தையில் காங்கிரஸ் கட்சி கடும் போராட்டத்திற்குப் பிறகு கடந்த முறையை விட 3 இடங்கள் கூடுதலாகப் பெற்று 28 தொகுதிகளை உறுதி செய்துள்ளது. ஆனால் மறுபுறம் மதிமுக மற்றும் இந்திய கம்யூனிஸ்ட் கட்சிகளுக்குக் கடந்த தேர்தலை விடக் குறைவான இடங்களே ஒதுக்கப்பட்டுள்ளன.

தற்போது மார்க்சிஸ்ட் கம்யூனிஸ்ட் மற்றும் விடுதலை சிறுத்தைகள் கட்சி போன்ற கட்சிகள் கூடுதல் இடங்களுக்காகத் தொடர்ந்து வலியுறுத்தி வருகின்றன. குறிப்பாகப் புதிய வரவான மக்கள் நீதி மய்யத்திற்கு 2 தொகுதிகள் ஒதுக்க முன்வந்துள்ள திமுக தலைமை அவர்களை உதயசூரியன் சின்னத்திலேயே போட்டியிட வேண்டும் என நிபந்தனை விதித்துள்ளதாகத் தெரிகிறது.

இது போன்ற நெருக்கடிகளால் கூட்டணிக் கட்சிகளுக்குள் அதிருப்தி நிலவி வருகிறது. கூட்டணியில் கடைசியாக இணைந்த தேமுதிகவிற்கு 10 தொகுதிகள் வரை ஒதுக்கப்படலாம் என்ற தகவல் மற்ற கூட்டணிக் கட்சிகளிடையே போர்க்கொடியைத் தூக்க வைத்துள்ளது.

தங்களை விடக் குறைவான வாக்கு வங்கி கொண்ட கட்சிக்குக் கூடுதல் இடங்கள் வழங்குவது முறையல்ல என மார்க்சிஸ்ட் மற்றும் விடுதலை சிறுத்தைகள் கட்சிகள் அதிருப்தி தெரிவித்துள்ளன. தேமுதிக அதிமுக கூட்டணிக்குச் சென்றுவிடக் கூடாது என்பதற்காகவே திமுக இந்தச் சலுகையை வழங்க முன்வந்ததாக அரசியல் வட்டாரத்தில் பேசப்படுகிறது.

குறைந்த தொகுதிகளை ஏற்றுக்கொண்டு கூட்டணியில் நீடிப்பதா அல்லது மாற்று முடிவு எடுப்பதா என்பது குறித்து அந்தந்தக் கட்சிகள் தற்போது தீவிர ஆலோசனையில் ஈடுபட்டு வருவதால் திமுக கூட்டணியில் தொகுதிப் பங்கீட்டுச் சிக்கல் தொடர்ந்து நீடித்து வருகிறது.