2026 தமிழக சட்டப்பேரவைத் தேர்தல் நெருங்கி வரும் வேளையில், திமுக தலைமையிலான கூட்டணியில் தொகுதிப் பங்கீடு குறித்த பேச்சுவார்த்தைகள் ஜெட் வேகத்தில் நடைபெற்று வருகின்றன. அந்த வகையில், மதிமுக (MDMK) பொதுச் செயலாளர் வைகோ மற்றும் முதல்வர் ஸ்டாலின் ஆகியோருக்கு இடையே இன்று நடைபெற்ற முக்கிய ஆலோசனையில், மதிமுக-வுக்கு 4 சட்டமன்றத் தொகுதிகள் ஒதுக்குவது என இறுதி முடிவு எடுக்கப்பட்டுள்ளது. டி.ஆர்.பாலு தலைமையிலான திமுக குழுவினர் நடத்திய தொடர் பேச்சுவார்த்தைக்குப் பிறகு, இந்த உடன்பாடு எட்டப்பட்டுள்ளது. ஏற்கெனவே காங்கிரஸ் மற்றும் இதர கட்சிகளுக்கு இடங்கள் ஒதுக்கப்பட்ட நிலையில், மதிமுக-வுக்கும் தற்போது இடங்கள் உறுதி செய்யப்பட்டுள்ளன.

​இந்தத் தொகுதிப் பங்கீட்டில் ஒரு முக்கிய அம்சமாக, ஒதுக்கப்பட்ட 4 தொகுதிகளில் மூன்று இடங்களில் மதிமுக வேட்பாளர்கள் திமுக-வின் ‘உதயசூரியன்’ சின்னத்தில் போட்டியிட உள்ளனர். எஞ்சிய ஒரு தொகுதியில் மட்டும் மதிமுக-வுக்கு ஒதுக்கப்படும் ‘தனிச் சின்னத்தில்’ அக்கட்சி வேட்பாளர் களம் இறங்குவார் என அறிவிக்கப்பட்டுள்ளது. திமுக கூட்டணியில் காங்கிரஸ் கட்சிக்கு 28 இடங்களும், இந்திய யூனியன் முஸ்லீம் லீக் மற்றும் மமக ஆகிய கட்சிகளுக்குத் தலா 2 இடங்களும் ஒதுக்கப்பட்ட நிலையில், தற்போது மதிமுக-வுக்கும் சுமுகமாக இடங்கள் ஒதுக்கப்பட்டிருப்பது தொண்டர்கள் மத்தியில் உற்சாகத்தை ஏற்படுத்தியுள்ளது.