அணுசக்தி ஒப்பந்தத்தில் கையெழுத்திட மறுத்த ஈரான் மீது அமெரிக்கா மற்றும் இஸ்ரேல் படைகள் இணைந்து போர் தொடுத்து வரும் நிலையில் அந்த நாட்டின் உச்ச தலைவர் அயதுல்லா அலி கமெனி கொல்லப்பட்டார். இதனைத் தொடர்ந்து ஈரானின் புதிய உச்ச தலைவராக அவரது இரண்டாவது மகன் மொஜ்தபா கமெனி தேர்வு செய்யப்பட்டுள்ளார்.

ஆனால் ஈரானின் புதிய தலைவராக மொஜ்தபா கமெனியை ஏற்க முடியாது என்று அமெரிக்க அதிபர் டிரம்ப் திட்டவட்டமாகத் தெரிவித்துள்ளார். பழைய கொள்கைகளையே பின்பற்றும் ஒரு தலைவரை அங்கீகரிப்பது அமெரிக்காவை மீண்டும் ஒரு நீண்டகாலப் போருக்குத் தள்ளும் என்று அவர் எச்சரித்துள்ளார்.

ஈரானில் புதிய தலைவரை நியமிக்கும் விவகாரத்தில் வெனிசுலாவில் மேற்கொண்டதைப் போலத் தாம் தனிப்பட்ட முறையில் தலையிட விரும்புவதாக டிரம்ப் குறிப்பிட்டுள்ளார். ஈரானுக்கு அமைதியையும் நல்லிணக்கத்தையும் கொண்டு வரக்கூடிய பகுத்தறிவு மிக்க ஒருவரே நாட்டை வழிநடத்த வேண்டும் என்று அவர் கூறியுள்ளார்.

ஈரானின் புரட்சிகரக் காவல்படை மற்றும் ராணுவத்தினர் தங்களது ஆயுதங்களைக் கீழே போட்டுவிட்டு ஒரு சிறந்த ஈரானை வடிவமைக்க அமெரிக்காவிற்கு உதவ வேண்டும் என்று அவர் அழைப்பு விடுத்துள்ளார். ஈரானிடம் அணு ஆயுதங்கள் இருக்கக் கூடாது என்பதில் அமெரிக்கா உறுதியாக இருப்பதாகவும் அவர் தெரிவித்தார்.

ஈரானுடனான இந்தப் போர் எவ்வளவு காலம் நீடித்தாலும் அதனை எதிர்கொள்ளத் தாம் தயாராக இருப்பதாகக் கூறிய டிரம்ப் அதற்கான நேர வரம்புகள் ஏதுமில்லை என்று சுட்டிக்காட்டினார். ஈரான் தரப்பில் ஒப்பந்தம் செய்ய அமெரிக்காவை அணுகிய போதிலும் அந்த கோரிக்கை மிகவும் தாமதமாக வந்துள்ளதாக அவர் விமர்சித்துள்ளார்.

தற்போது அமெரிக்க ராணுவம் இஸ்ரேலிய படைகளுடன் இணைந்து ஈரானின் ஏவுகணைகள் மற்றும் டிரோன் கட்டமைப்புகளை ஒவ்வொரு மணி நேரமும் அழித்து வருவதாக அவர் தெரிவித்தார். ஈரானின் புதிய தலைமை மற்றும் போர் நடவடிக்கைகள் குறித்து டிரம்ப் வெளியிட்டுள்ள இந்த அறிக்கை சர்வதேச அரசியலில் பெரும் பரபரப்பை ஏற்படுத்தியுள்ளது.