90-களில் தமிழ் சினிமாவின் முன்னணி நடிகையாக வலம் வந்த மோகினி, சமீபத்திய பேட்டி ஒன்றில் தனது வாழ்க்கை பயணம் குறித்து உருக்கமாகப் பகிர்ந்துள்ளார். 13 வயதில் டான்ஸ் கிளாஸ் சென்றபோது, நடிகை வித்யாவைப் பார்த்து தானும் பிரபலமாக வேண்டும் என்ற ஆசையில் படிப்பை பாதியில் விட்டதுதான் தனது வாழ்க்கையின் மிகப்பெரிய திருப்பம் என்று அவர் கூறியுள்ளார்.

அன்று சினிமா வாய்ப்பு கிடைத்ததை பெருமையாக நினைத்தாலும், இன்று அந்த வயதில் படிப்பைத் தொடராமல் போனதை நினைத்து வருந்துவதாகவும், மனித வாழ்க்கைக்குப் புகழை விட கல்விதான் மிக முக்கியம் என்பதைத் தாமதமாகப் புரிந்து கொண்டதாகவும் அவர் தெரிவித்துள்ளார்.

இன்றைய காலக்கட்டத்தில் சமூக வலைதளங்களில் சிறுவர்கள் முதல் இளைஞர்கள் வரை விரைவான புகழுக்காகப் படிப்பைப் புறக்கணிப்பதைப் பார்க்கும்போது, தனது அனுபவம் அவர்களுக்கு ஒரு பாடமாக அமையும் என மோகினி கூறியுள்ளார்.

‘ஈரமான ரோஜாவே’ உள்ளிட்ட பல வெற்றிப் படங்களில் நடித்திருந்தாலும், சினிமா புகழ் என்பது நிரந்தரமானது அல்ல என்பதைக் காலம் உணர்த்திவிட்டதாக அவர் மனம் திறந்து பேசியுள்ளார்.

வாழ்க்கையில் நிலையான இடத்தைப் பிடிக்க முறையான கல்வி அவசியம் என்ற மோகினியின் இந்த அனுபவப் பேச்சு, தற்போது இணையத்தில் பலரது கவனத்தையும் ஈர்த்து வருகிறது.