தாய்லாந்தில் நடைபெற்று வரும் ரைசிங் ஸ்டார்ஸ் மகளிர் ஆசிய கோப்பை டி20 தொடரில், பரம எதிரியான பாகிஸ்தான் அணியை இந்திய மகளிர் ‘A’ அணி துவம்சம் செய்துள்ளது. முதலில் பேட்டிங் செய்த பாகிஸ்தான் அணி, இந்திய வீராங்கனைகளின் துல்லியமான பந்துவீச்சை எதிர்கொள்ள முடியாமல் அடுத்தடுத்து விக்கெட்டுகளைப் பறிகொடுத்தது. அந்த அணியின் 7 வீராங்கனைகள் ஒற்றை இலக்க ரன்களில் ஆட்டமிழக்க, ஒட்டுமொத்த பாகிஸ்தான் அணியும் 20 ஓவர் முடிவில் வெறும் 93 ரன்களுக்குச் சுருண்டது.

​அடுத்து களமிறங்கிய இந்திய அணிக்கு, தொடக்க வீராங்கனை விருந்தா சிம்மசொப்பனமாகத் திகழ்ந்தார். பாகிஸ்தான் பந்துவீச்சை நாலாபுறமும் சிதறடித்த அவர், அதிரடியாக அரைசதம் விளாசி அணியின் வெற்றியை உறுதி செய்தார். இதன் மூலம் 94 ரன்கள் என்ற எளிய இலக்கை இந்திய அணி வெறும் 10.1 ஓவர்களிலேயே எட்டிப் பிடித்து, அபார வெற்றியைப் பதிவு செய்தது. ஆசிய கோப்பையில் இந்திய அணியின் இந்த அதிரடித் தொடக்கம் ரசிகர்களிடையே பெரும் உற்சாகத்தை ஏற்படுத்தியுள்ளது.