திருநெல்வேலியில் செய்தியாளர்களைச் சந்தித்த பாஜக மாநிலத் தலைவர் நயினார் நாகேந்திரன், வரும் சட்டமன்றத் தேர்தலில் தேசிய ஜனநாயகக் கூட்டணி 200-க்கும் மேற்பட்ட இடங்களில் வெற்றி பெறும் என்று நம்பிக்கை தெரிவித்தார்.

இந்தக் கூட்டணியின் முதலமைச்சர் வேட்பாளர் எடப்பாடி பழனிசாமி தான் என்பதில் எந்த மாற்றமும் இல்லை என்றும், தேர்தலில் அதிக இடங்களில் வெற்றி பெறும் கட்சிகளே அமைச்சரவையில் இடம்பெறும் என்றும் அவர் விளக்கமளித்தார். ஆட்சியில் பங்கு வேண்டும் என்ற எந்த நிபந்தனையையும் பாஜக இதுவரை முன்வைக்கவில்லை என்றும் அவர் தெளிவுபடுத்தினார்.

திமுகவின் ஆட்சி குறித்து விமர்சித்த அவர், அடுத்த முதலமைச்சராக உதயநிதி ஸ்டாலினை முன்னிறுத்துவதன் மூலம் தமிழகத்தில் குடும்ப ஆட்சி நடப்பதை ஸ்டாலின் உறுதிப்படுத்துவதாகக் கூறினார்.

மத்திய அரசு தமிழகத்திற்குப் போதிய நிதி ஒதுக்கவில்லை என்று திமுக பொய்யான தகவல்களைப் பரப்புவதாகவும், தோல்வி பயத்தின் காரணமாகவே அவர்கள் இவ்வாறு பேசுவதாகவும் நயினார் நாகேந்திரன் சாடினார். தமிழகத்தில் கஞ்சா புழக்கம், ஊழல் மற்றும் குற்றச் சம்பவங்கள் அதிகரித்துள்ளதாக அவர் குற்றம் சாட்டினார்.

கூட்டணி குறித்துப் பேசிய அவர், தேமுதிகவுடன் பேச்சுவார்த்தை முடிந்தவுடன் முறையான அறிவிப்பு வெளியாகும் என்றும், தற்போது வரை ஓ.பன்னீர்செல்வத்தை அழைப்பது குறித்து எந்த முயற்சியும் எடுக்கப்படவில்லை என்றும் தெரிவித்தார்.

மேலும், காங்கிரஸ் கட்சி திமுகவுடன் தொடருமா அல்லது நடிகர் விஜய்யின் கட்சியுடன் இணையுமா என்பது கேள்விக்குறியாக உள்ளதாகவும், இதற்காக கனிமொழி பேச்சுவார்த்தை நடத்தி வருவதாகவும் அவர் ஒரு தகவலைப் பகிர்ந்துள்ளார்.