அதிமுக முன்னாள் அமைச்சர் திண்டுக்கல் சீனிவாசன், தவெக தலைவர் விஜய்யை நோக்கி அடுக்கடுக்கான கேள்விகளை எழுப்பியுள்ளார். “பாஜகவை பொது எதிரி என்று கூறும் விஜய், அக்கட்சியை நேரடியாக விமர்சிக்கத் தயங்குவது ஏன்?” என்று வினவிய அவர், அதிமுகவை ஊழல் கட்சி என்று விமர்சிக்க விஜய்க்குத் தகுதி இல்லை என்று சாடினார். மேலும், “விஜய் சினிமாவில் சம்பாதித்தது கருப்பு பணமா அல்லது வெள்ளை பணமா?” என்று கேள்வி எழுப்பிய சீனிவாசன், ஊழல்வாதிகள் எல்லாம் இன்று தவெக-வில் இணைந்து வருவதாகக் குற்றம் சாட்டினார்.

குறிப்பாக, தவெக-வில் இணைந்துள்ள ஆதவ் அர்ஜுனா நேர்மையாகச் சம்பாதித்தவரா என்றும், வருமானத்திற்கு அதிகமாகச் சொத்து சேர்த்ததற்காகச் சிறை சென்றவர் தான் செங்கோட்டையன் என்றும் மிகக் காட்டமாக விமர்சித்தார். ​திண்டுக்கல் சீனிவாசனின் இந்தப் பேச்சு தவெக மற்றும் அதிமுக தொண்டர்களிடையே பெரும் பரபரப்பை ஏற்படுத்தியுள்ளது. ஏற்கனவே அதிமுக-விலிருந்து விலகிச் சென்ற செங்கோட்டையனை செல்லூர் ராஜூ “செல்லாக் காசு” என்று விமர்சித்த நிலையில், தற்போது சீனிவாசனும் அவரது பழைய ஊழல் வழக்குகளைக் கிளறியிருப்பது அரசியல் மோதலை உச்சத்திற்குத் தள்ளியுள்ளது.

விஜய்யின் அரசியல் வருகை ஆளுங்கட்சியான திமுகவை விட, எதிர்க்கட்சியான அதிமுகவைத்தான் அதிகம் எரிச்சலடையச் செய்துள்ளதோ என அரசியல் விமர்சகர்கள் கருதுகின்றனர். “உங்க மேல ஆயிரம் குறை வச்சுக்கிட்டு எங்க ஊழலைப் பத்தி பேசாதீங்க” என அதிமுக நிர்வாகிகள் வரிந்து கட்டிக்கொண்டு விஜய்யைத் தாக்கி வருவது 2026 தேர்தலுக்கான முன்னோட்டமாகவே பார்க்கப்படுகிறது.