அமெரிக்காவின் மினசோட்டா மாநிலத்தில், 5 வயதே ஆன லியாம் கொனேஜோ ராமோஸ் (Liam Conejo Ramos) என்ற சிறுவனை அந்நாட்டு குடியேற்ற அதிகாரிகள் (Immigration officials) சட்டவிரோதமாகத் தடுத்து வைத்துள்ளனர். பள்ளி முடிந்து வீடு திரும்பிய அந்தச் சிறுவனை வழிமறித்த அதிகாரிகள், அவனை ஒரு கருவியாகப் பயன்படுத்தியுள்ளனர். அதாவது, அந்தச் சிறுவனை அவனது வீட்டின் கதவைத் தட்டச் சொல்லி, உள்ளே யாராவது இருக்கிறார்களா என்று பார்க்கச் சொல்லியுள்ளனர். ஒரு குழந்தையைத் தூண்டிலாகப் பயன்படுத்தி, வீட்டிற்குள் இருக்கும் மற்றவர்களைப் பிடிக்க நினைத்த அதிகாரிகளின் இந்தச் செயல், பார்ப்பவர்களை முகம் சுளிக்க வைத்துள்ளது. 2024-ம் ஆண்டு அமெரிக்காவிற்கு வந்த அந்தச் சிறுவனின் குடும்பத்திற்கு இது மிகப்பெரிய மன உளைச்சலை ஏற்படுத்தியுள்ளது.

​இந்த விவகாரத்தைப் பற்றி அந்தச் சிறுவன் படிக்கும் பள்ளியின் நிர்வாகிகள் கூறும்போது, “ஒரு 5 வயதுக் குழந்தையை அதிகாரிகளே இப்படி ‘பேட்’ (Bait) போலப் பயன்படுத்துவது மிகக் கொடூரமானது” என்று வேதனையுடன் தெரிவித்துள்ளனர். பிஞ்சு உள்ளத்தில் பயத்தையும் நடுக்கத்தையும் விதைக்கும் இத்தகைய செயல்கள், அமெரிக்கக் குடியேற்றத் துறையின் செயல்பாடுகள் மீது பெரிய கேள்விக்குறியை எழுப்பியுள்ளது. ஒரு குழந்தையை வைத்து அதன் குடும்பத்தினரை வேட்டையாட நினைக்கும் இந்த மனிதாபிமானமற்ற அராஜகத்திற்கு எதிராக, சமூக ஆர்வலர்களும் பொதுமக்களும் இப்போது கடும் கண்டனங்களைத் தெரிவித்து வருகின்றனர்.