தமிழக வெற்றிக் கழகத்தின் மாநில நிர்வாகக் குழு தலைமை ஒருங்கிணைப்பாளராகப் பொறுப்பு வகித்து வரும் செங்கோட்டையன், ஈரோடு மாவட்டத்தில் கட்சியின் மக்கள் சந்திப்பு நிகழ்ச்சிகள் மற்றும் கிளை அலுவலகங்கள் திறப்பு எனத் தீவிரமாகப் பணியாற்றி வருகிறார்.

இந்த நிலையில், தவெக-வில் அவருக்குச் சில அதிருப்திகள் இருப்பதாகவும், அதனால் அவர் சட்டமன்றத் தேர்தலுக்கு முன்பாக வேறு கட்சிக்கு மாறத் திட்டமிட்டுள்ளதாகவும் ஒரு பிரபல நாளிதழில் செய்தி வெளியானது. இந்தத் தகவல் அரசியல் வட்டாரத்தில் பெரும் பரபரப்பை ஏற்படுத்தியது.

தனது கட்சி மாற்றம் குறித்த வதந்திகளுக்கு செங்கோட்டையன் தனது எக்ஸ் (X) பக்கத்தில் மிகத் தெளிவான விளக்கத்தை அளித்துள்ளார். அதில், தான் எம்.ஜி.ஆர் மற்றும் ஜெயலலிதா வழியில் வந்தவன் என்றும், தனக்கு அரசியல் வாழ்வில் ஒரு வரலாற்றைப் படைக்க வாய்ப்பளித்த தவெக தலைவர் விஜய் தனது நெஞ்சில் நீங்கா இடம் பிடித்தவர் என்றும் பெருமிதத்துடன் குறிப்பிட்டுள்ளார்.

தலைவர் விஜய்யின் தியாகத்தையும் மனித நேயத்தையும் யாராலும் ஈடு செய்ய முடியாது எனவும் அவர் புகழாரம் சூட்டியுள்ளார். மேலும், 2026-ஆம் ஆண்டு விஜய்யைத் தமிழக முதலமைச்சர் ஆக்கும் வரை அனைவரும் ஒன்றிணைந்து உழைப்போம் என்று கூறியுள்ள அவர், நாளிதழில் வெளியான செய்தி முற்றிலும் உண்மைக்கு மாறானது எனத் தெரிவித்தார்.

நடுநிலை எனச் சொல்லிக்கொண்டு தவறான தகவல்களைப் பரப்புவது பத்திரிகை தர்மத்திற்கு அழகல்ல என்றும், அத்தகைய செய்தியைத் தான் வன்மையாகக் கண்டிப்பதாகவும் செங்கோட்டையன் திட்டவட்டமாகத் தெரிவித்துள்ளார்.