சென்னை கீழ்ப்பாக்கம் அரசு மருத்துவமனை வளாகத்திற்குள் புகுந்த மர்ம கும்பல், ரவுடி ஒருவரை ஓட ஓட விரட்டி வெட்டிக்கொலை செய்தது. இந்தச் சம்பவம் நோயாளிகள் மற்றும் பொதுமக்கள் மத்தியில் பெரும் அதிர்ச்சியை ஏற்படுத்தியுள்ளது.

சென்னை பகுதியைச் சேர்ந்த பிரபல ரவுடி ஆதி என்பவர், கீழ்ப்பாக்கம் அரசு மருத்துவமனையின் பிரசவ வார்டில் அனுமதிக்கப்பட்டிருந்த தனது தோழி சுசித்ராவைக் காண்பதற்காக நேற்று  மருத்துவமனைக்கு வந்துள்ளார். அவர் வார்டு அருகே நின்று கொண்டிருந்தபோது, அங்கு வந்த மூன்று பேர் கொண்ட கும்பல் மறைத்து வைத்திருந்த அரிவாள்களால் ஆதியை சரமாரியாக வெட்டியது.

தலை, கை மற்றும் கால் உள்ளிட்ட உடல் உறுப்புகளில் பலத்த வெட்டுக்காயங்கள் ஏற்பட்ட ஆதி, ரத்த வெள்ளத்தில் சம்பவ இடத்திலேயே துடிதுடித்து உயிரிழந்தார். பட்டப்பகலில், மக்கள் நடமாட்டம் மிகுந்த மருத்துவமனை வளாகத்தில் நடந்த இந்தத் துணிகரக் கொலைச் சம்பவம் அப்பகுதியில் பெரும் பதற்றத்தை உருவாக்கியுள்ளது.

தகவல் அறிந்து விரைந்து வந்த கீழ்ப்பாக்கம் போலீசார், ஆதியின் உடலைக் கைப்பற்றிப் பிரேதப் பரிசோதனைக்கு அனுப்பி வைத்தனர். முதற்கட்ட விசாரணையில் கிடைத்த தகவல்கள் வருமாறு:
ஆதியின் தோழி சுசித்ராவின் உறவினர்களே இந்தக் கொலையைச் செய்திருப்பது தெரியவந்துள்ளது.

சுசித்ராவின் உறவினர்களான சூர்யா, அலிபாய் மற்றும் கார்த்திக் ஆகிய மூவர் மீது போலீசாருக்குச் சந்தேகம் ஏற்பட்டுள்ளது. முன்விரோதம் காரணமாக இந்தக் கொலை நடந்ததா அல்லது வேறு ஏதேனும் காரணமா என்பது குறித்துப் போலீசார் தீவிரமாக விசாரித்து வருகின்றனர்.
தற்போது தலைமறைவாக உள்ள சூர்யா உள்ளிட்ட மூவரையும் பிடிக்கப் போலீசார் தனிப்படை அமைத்துத் தீவிர தேடுதல் வேட்டையில் ஈடுபட்டுள்ளனர்.