சேலம் மாவட்டம் எடப்பாடி அருகே நேற்று நள்ளிரவில் நடந்த பயங்கர விபத்து ஒட்டுமொத்த தமிழகத்தையுமே சோகத்தில் ஆழ்த்தியுள்ளது. நங்கவள்ளி – ஜலகண்டபுரம் பிரதான சாலையில் சென்றுகொண்டிருந்த சரக்கு ஆட்டோ மீது, மோட்டார் சைக்கிள் ஒன்று எதிர்பாராத விதமாக நேருக்கு நேர் பயங்கரமாக மோதியது. இந்த கோர விபத்தில் சிக்கி, மோட்டார் சைக்கிளில் பயணித்த எடப்பாடியைச் சேர்ந்த மூன்று பேர் தலை நசுங்கி சம்பவ இடத்திலேயே அடுத்தடுத்து துடிதுடித்து உயிரிழந்தனர்.
தகவலறிந்து வந்த போலீசார், பலத்த காயமடைந்து உயிருக்கு போராடிக்கொண்டிருந்த ஒருவரை மீட்டு மருத்துவமனையில் அனுமதித்துள்ளனர். அவருக்கு தற்போது தீவிர சிகிச்சை அளிக்கப்பட்டு வருகிறது. நள்ளிரவு நேரத்தில் இந்த விபத்து அதிவேகத்தால் நடந்ததா அல்லது வேறு ஏதேனும் காரணமா என்பது குறித்து போலீசார் தீவிர விசாரணை நடத்தி வருகின்றனர். பலியானவர்களின் குடும்பத்தினர் மற்றும் உறவினர்கள் கதறி அழுவது அப்பகுதி மக்கள் அனைவரையும் பெரும் சோகத்தில் ஆழ்த்தியுள்ளது.
