சத்தீஸ்கர் மாநிலம் நாராயண்பூர் மாவட்டத்தில், காணாமல் போன 11 வயது சிறுமி பாலியல் வன்கொடுமை செய்யப்பட்டு, கோடாரியால் வெட்டிப் படுகொலை செய்யப்பட்ட கொடூர சம்பவம் நாடு முழுவதும் அதிர்ச்சியை ஏற்படுத்தியுள்ளது.

கடந்த டிசம்பர் 31-ம் தேதி வீட்டை விட்டு மாயமான அந்தச் சிறுமியைப் பெற்றோர் மற்றும் போலீசார் தீவிரமாகத் தேடி வந்த நிலையில், இன்று ஊருக்கு அருகே உள்ள வயல்வெளியில் சிறுமி ரத்த வெள்ளத்தில் சடலமாகக் கண்டெடுக்கப்பட்டார்.

சிறுமியின் உடலைக் கைப்பற்றிய போலீசார் நடத்திய பிரேதப் பரிசோதனையில், அந்தப் பிஞ்சு சிறுமி மிகக் கொடூரமான முறையில் பாலியல் வன்கொடுமைக்கு உள்ளாக்கப்பட்டு, பின்னர் கோடாரியால் வெட்டிக் கொல்லப்பட்டது உறுதியானது.

இந்தக் கொடூரச் செயலில் ஈடுபட்டது யார் என்று போலீசார் நடத்திய அதிரடி விசாரணையில், சிறுமியின் குடும்பத்திற்கு மிகவும் நெருக்கமான 24 வயது இளைஞர் ஒருவர்தான் இந்தக் கொலையைச் செய்தது அம்பலமானது.

சிறுமியைக் கடத்திச் சென்று தனது காம வெறியைத் தீர்த்துக்கொண்ட அந்த இளைஞர், பின்னர் மாட்டிக்கொள்வோம் என்ற பயத்தில் கோடாரியால் சிறுமியை வெட்டிச் சாய்த்துள்ளார்.

தற்போது அந்த வாலிபரைப் போலீசார் கைது செய்து சிறையில் அடைத்துள்ளனர். புத்தாண்டு கொண்டாட்ட நேரத்தில் நடந்த இந்த மனிதாபிமானமற்ற சம்பவம், அந்தப் பகுதி மக்களிடையே பெரும் கொந்தளிப்பையும் சோகத்தையும் ஏற்படுத்தியுள்ளது.