பீகார் மாநிலத்தைச் சேர்ந்த 14 வயது இளம் கிரிக்கெட் வீரர் வைபவ் சூர்யவன்ஷி, விஜய் ஹசாரே கோப்பை கிரிக்கெட் தொடரின் முதல் ஆட்டத்திலேயே 190 ரன்கள் விளாசி உலக சாதனைகளைப் படைத்துள்ளார். அருணாச்சல பிரதேச அணிக்கு எதிரான இந்தப் போட்டியில், வெறும் 36 பந்துகளில் சதம் அடித்த அவர், ஒட்டுமொத்தமாக 84 பந்துகளில் 15 சிக்ஸர்கள் மற்றும் 16 பவுண்டரிகளுடன் 190 ரன்கள் குவித்து அசத்தினார்.

இதன் மூலம் லிஸ்ட்-ஏ கிரிக்கெட் வரலாற்றில் மிக இளம் வயதில் சதம் அடித்த வீரர் என்ற சாதனையை அவர் படைத்துள்ளார். அவரது இந்த அதிரடி ஆட்டத்தின் உதவியுடன் பீகார் அணி 50 ஓவர்களில் 574 ரன்கள் குவித்து, லிஸ்ட்-ஏ கிரிக்கெட்டில் அதிகபட்ச ரன்கள் எடுத்த அணி என்ற புதிய உலக சாதனையை எழுதியுள்ளது.

அவரது அபார வளர்ச்சியைப் பார்த்து வியக்கும் அதே வேளையில், சமூக வலைதளங்களில் அவரது வயது குறித்துப் பல்வேறு விமர்சனங்கள் எழுந்து வருகின்றன. அவர் 14 வயதுக்கு மேற்பட்டவர் என்று சிலர் குற்றம் சாட்டி வரும் நிலையில், பிசிசிஐ நடத்திய வயது கண்டறியும் சோதனையில் அவர் முறையாகத் தேர்ச்சி பெற்றுள்ளதை ஆதரவாளர்கள் சுட்டிக்காட்டுகின்றனர்.

மேலும், 2017 மற்றும் 2020-ஆம் ஆண்டுகளில் எடுக்கப்பட்ட அவரது சிறுவயது புகைப்படங்களைப் பகிர்ந்து வரும் ரசிகர்கள், அவர் முறையான ஆவணங்களுடன் தான் விளையாடி வருகிறார் என்பதை உறுதிப்படுத்தி வருகின்றனர். ராஜஸ்தான் ராயல்ஸ் அணியால் ஐபிஎல் 2026 தொடருக்காகத் தக்கவைக்கப்பட்டுள்ள இவருக்கு, ஐபிஎல் தொடருக்குப் பிறகு இந்திய அணியில் விளையாடும் வாய்ப்பு விரைவில் கிடைக்கும் என்று அவரது பயிற்சியாளர் மனிஷ் ஓஜா நம்பிக்கை தெரிவித்துள்ளார்.