திருமண தகவல் மையங்கள் மற்றும் சமூக வலைதளங்களை பயன்படுத்தி பல இளம்பெண்களை நம்ப வைக்கச் செய்து, பின்னர் பாலியல் வன்கொடுமை மற்றும் நகை, பண மோசடியில் ஈடுபட்ட நுங்கம்பாக்கத்தை சேர்ந்த சுரேஷ்குமார் (வயது 39) என்பவர் கைது செய்யப்பட்டுள்ளார்.

எம்.பி.ஏ. பட்டதாரியான இவர், ஏற்கனவே இரு திருமணங்கள் செய்து குடும்பத்தோடு வாழ்ந்து வந்துள்ளார். இருப்பினும், திருமணமாகாதவர் போல நடித்து திருமண தகவல் மையம் மற்றும் இன்ஸ்டாகிராம் போன்ற வலைதளங்கள் மூலம் பல இளம்பெண்களை தொடர்பு கொண்டுள்ளார்.

தேனாம்பேட்டை பகுதியில் வசிக்கும், கணவனை இழந்த இரு குழந்தைகளின் தாயான இளம்பெண் ஒருவர் திருமண தகவல் மையம் வாயிலாக சுரேஷ்குமாரை சந்தித்துள்ளார். “உங்கள் குழந்தைகளை என் குழந்தையாக பார்க்கிறேன்” என்ற வார்த்தைகள் மூலம் நம்பிக்கை பெற முயன்ற சுரேஷ், அந்த பெண்ணை நுங்கம்பாக்கத்தில் உள்ள ஒரு பூங்காவில் நேரில் சந்தித்துள்ளார்.

அங்கு, ஆசை வார்த்தைகளுக்குப் பின்னால் பாலியல் வன்கொடுமை செய்ததுடன், பின்னர் காரில் பேச்சு நடத்தும் போது அந்த பெண்ணின் பையில் இருந்த 10 சவரன் தங்க நகைகளை திருடிச் சென்றதாக கூறப்படுகிறது. சம்பவத்துக்குப் பின்னர் பாதிக்கப்பட்ட பெண் தேனாம்பேட்டை போலீசில் புகார் அளித்தார்.

புகாரின் அடிப்படையில் வழக்கு பதிவு செய்த போலீசார் சுரேஷ்குமாரை கைது செய்து விசாரணை நடத்தினர். இதில், இதேபோன்ற மோசடிகளை முன்பும் பலமுறை நடத்தியுள்ளார் என்பதும், நுங்கம்பாக்கம் மற்றும் கோடம்பாக்கம் போலீஸ் நிலையங்களில் பல வழக்குகள் இருப்பதும் கண்டுபிடிக்கப்பட்டது.

மேலும், இதுவரை சுரேஷ்குமார் குறைந்தது 8 பெண்களை இப்படியான முறையில் காதல் வலையில் சிக்கவைத்து ஏமாற்றியுள்ளதும், தனது கட்டுமஸ்தான உடல் உருவங்களை இன்ஸ்டாகிராம் போன்ற சமூக வலைதளங்களில் பதிவிட்டு பெண்களை கவர்ந்துள்ளதும் தெரியவந்தது. இவர்களில் சிலருடன் நேரில் சந்தித்து வன்கொடுமை செய்துள்ளதுடன், சிலருடன் தொடர்ச்சியாக சாட் மூலம் தொடர்பில் இருந்துள்ளார் என்றும் போலீசார் தெரிவித்தனர்.

திருமண வாழ்க்கை முடிந்து தனியாக வாழும் பெண்கள், விதவைப் பெண்கள் போன்றவர்களை மட்டும் குறிவைத்து சுரேஷ்குமார் செயல்பட்டுள்ளார். அவர்களை நம்ப வைக்கும் வகையில் பேசி, பின்னர் நகை, பணம் மற்றும் பிற மதிப்புள்ள சொத்துக்களை பெற்றுக் கொண்டு ஏமாற்றுவதாகவும் போலீசார் தெரிவித்துள்ளனர்.

தற்போது கைது செய்யப்பட்டுள்ள சுரேஷ்குமார் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டுள்ளார். இதேபோன்று இவரிடம் ஏமாந்தவர்கள் மேலும் இருந்தால், அருகிலுள்ள போலீஸ் நிலையத்தில் முறையிடலாம் என காவல்துறையினர் அறிவுறுத்தியுள்ளனர்.