கர்நாடக மாநிலம் ஹாசன் மாவட்டத்தில் உணர்ச்சி ஆதங்கத்தால்  உயிரிழந்த பெண்ணின் மர்ம மரணம் பெரும் அதிர்ச்சியை ஏற்படுத்தியுள்ளது. ரவி (34) என்றவர், தனது மனைவியுடன் வாழ்ந்து வரும் நிலையிலும், தனது அலுவலகத்தில் பணியாற்றும் ஸ்வேதா (32) மீது காதல் வைத்ததாக கூறப்படுகிறது. திருமணமான ஸ்வேதா கணவரை பிரிந்து பெற்றோருடன் வசித்து வந்தார். இருவரும் ஒரே நிறுவனத்தில் வேலை பார்த்ததால், நண்பர்களாக பழகினர். ஆனால், அது பின்னர் ஒருதரப்பட்ட காதலாக மாறியது.

ரவிக்கு ஏற்பட்ட காதலை ஸ்வேதா தொடர்ச்சியாக நிராகரித்து வந்தார். “உங்களுக்கே குடும்பம் இருக்கிறதே, என்னை ஏன் வற்புறுத்துகிறீர்கள்?” என அவர் தெளிவாக கூறியும், ரவி விடாமல் தொடர்ந்துள்ளார். பலமுறை ஸ்வேதாவிடம் காதலை வெளிப்படுத்தியும், எவ்வித பதிலும் பெறவில்லை என்பதாலேயே, அவர் உள்ளேகொண்ட கோபம் கொந்தளித்தது.

சம்பவத்தன்று இருவரும் ஒரே காரில் சந்தனஹள்ளி அருகே உள்ள ஏரிக்கரையில் சென்றுள்ளனர். அங்கு மீண்டும் ரவி தனது காதலை வலியுறுத்தினார். ஆனால் ஸ்வேதா மறுத்தவுடன், மனம் பொறுக்காத ரவி காருடன் நேராக ஏரிக்குள் பாய்ந்துவிட்டார். துரதிருஷ்டவசமாக காருக்குள் இருந்த ஸ்வேதா தண்ணீரில் மூழ்கி உயிரிழந்தார். ஆனால், ரவி நீந்திக்கொண்டு கரையை அடைந்தார்.

சம்பவ இடத்திற்கு வந்த போலீசார் ஸ்வேதாவின் உடலை மீட்டு பிரேத பரிசோதனைக்காக அனுப்பி வைத்தனர். ரவியிடம் விசாரணை நடத்தியபோது, இது ஒரு விபத்தென்றும், தற்செயலாக கார் ஏரிக்குள் விழுந்ததாகவும் தெரிவித்தார். ஆனால் போலீசார் இந்த விவகாரம் ஒரு திட்டமிட்ட கொலையாக இருக்கலாம் என சந்தேகித்து, தற்போது கொலை வழக்குப்பதிவு செய்து தீவிர விசாரணை நடத்தி வருகின்றனர்.