ஈரோடு ரெயில் நிலையத்தில் இருந்து சென்னை சென்ட்ரல் நோக்கி புறப்பட்ட ஏற்காடு எக்ஸ்பிரஸ் ரெயிலில் நடந்த பரபரப்பான சம்பவம் ரெயில்வே பாதுகாப்புப் படையினரையே உஷாராக வைத்தது.

மொரப்பூர் ரெயில் நிலையம் வந்ததும், ஒரு மர்ம நபர் அவசர உதவிக் கைபேசி எண்கள் 100 மற்றும் 108-க்கு அழைத்து, “ஏற்காடு எக்ஸ்பிரஸ் ரெயிலை கடத்தப்போகிறேன்” என மிரட்டல் விடுத்து, உடனே போனை துண்டித்துவிட்டார்.

இது குறித்து தகவல் அறிந்ததும் மொரப்பூர் ரெயில்வே போலீசார் உடனடியாக நடவடிக்கை மேற்கொண்டனர். சைபர் கிரைம் பிரிவின் உதவியுடன், மிரட்டல் விடுத்த செல்போன் எண்ணை பின்தொடர்ந்த போலீசார், அந்த நபர், அதே ரெயிலில் முன்பதிவு செய்யப்படாத பெட்டியில் பயணம் செய்து கொண்டிருந்தது தெரியவந்தது. தகவலறிந்த ஜோலார்பேட்டை, காட்பாடி ரெயில்வே நிலையங்களில் பாதுகாப்பு பலப்படுத்தப்பட்டு, போலீசார் தயார் நிலையில் காத்திருந்தனர்.

காட்பாடி ரெயில் நிலையம் வந்ததும், பொதுப் பெட்டிக்குள் விரைந்து சென்ற போலீசார், மிரட்டல் விடுத்த நபர் சபரீசனை கைது செய்தனர். இவர் தர்மபுரியைச் சேர்ந்தவர் என்றும், மின்சார வாரியத்தில் தற்காலிக வேலை செய்த அனுபவமுள்ளவர் என்றும் தெரியவந்தது.

தற்போது வேலை இல்லாமல் உள்ளதால் மன விரக்தியில் இந்த செயலை செய்ததாக போலீசாரிடம் வாக்குமூலம் அளித்துள்ளார். அவரை சேலம் ரெயில்வே போலீசிடம் ஒப்படைத்தனர். இது போன்ற செயல், போலீசாரிடையே பெரும் பரபரப்பையும் பயணிகளிடையே பதட்டத்தையும் ஏற்படுத்தியது.