சுற்றுலா மற்றும் அது சார்ந்த துறைகளில் பங்காற்றி வரும் அமைப்புசாரா தொழிலாளர்களின் எதிர்காலப் பாதுகாப்பைக் கருத்தில் கொண்டு, மத்திய மற்றும் மாநில அரசுகளின் பங்களிப்புடன் கூடிய பிரதான் மந்திரி ஷ்ரம் யோகி மாந்தன் (PM-SYM) ஓய்வூதியத் திட்டம் செயல்படுத்தப்பட்டு வருகிறது. இந்தத் திட்டத்தின் கீழ், சுற்றுலா வழிகாட்டிகள், வாகன ஓட்டுநர்கள், விடுதிப் பணியாளர்கள், கைவினைக் கலைஞர்கள் மற்றும் தெருவோர வியாபாரிகள் உள்ளிட்ட பல்வேறு தரப்பட்ட சேவை வழங்குநர்கள் தங்களை இணைத்துக்கொண்டு பயனடையலாம் என அறிவிக்கப்பட்டுள்ளது.

பதினெட்டு வயது முதல் நாற்பது வயது வரை உள்ள தகுதியுடைய தொழிலாளர்கள் தங்களது மாதாந்திர பங்களிப்புத் தொகையைச் செலுத்தி வந்தால், அவர்கள் அறுபது வயதை எட்டியதும் மத்திய அரசு மூலமாக மாதந்தோறும் உறுதியான 3,000 ரூபாய் ஓய்வூ தொகையாக வழங்கப்படும். இத்தகைய சிறப்பான திட்டத்தில் தஞ்சாவூர் மாவட்டத்தைச் சேர்ந்த தகுதியுள்ள தொழிலாளர்கள் அனைவரும் முழுமையாகப் பயன்பெறும் வகையில் உரிய விழிப்புணர்வை ஏற்படுத்திட வேண்டும் என மாவட்ட ஆட்சியர் ரேவரி கேட்டுக்கொண்டுள்ளார்.

விருப்பமுள்ள நபர்கள் தங்களது ஆதார் அட்டை, சேமிப்பு வங்கிக் கணக்குப் புத்தகம் மற்றும் செல்போன் எண்ணை உடன் கொண்டு சென்று தங்களுக்கு அருகில் உள்ள பொதுசேவை மையங்கள் (e-Seva Centre) மூலமாக எளிதில் பதிவு செய்து கொள்ளலாம். மேலும், இது தொடர்பான கூடுதல் சந்தேகங்கள் மற்றும் வழிகாட்டுதல்களைப் பெற விரும்புவோர் தஞ்சாவூர் மாவட்ட சுற்றுலா அலுவலரின் 9176995873 என்ற எண்ணைத் தொடர்பு கொள்ளலாம் எனவும் அதிகாரப்பூர்வமாகத் தெரிவிக்கப்பட்டுள்ளது.