தமிழக வெற்றிக் கழக மாநாடும் அரசியல் விமர்சனங்களும்தமிழக வெற்றிக் கழகத்தின் இரண்டாவது மாநில மாநாடு இன்று மதுரையில் கோலாகலமாக நடைபெறுகிறது. இந்த மாநாடு, நடிகர் விஜய்யின் அரசியல் பயணத்தில் முக்கியமான மைல்கல்லாகப் பார்க்கப்படுகிறது. ஆனால், இந்த நிகழ்வை மையமாக வைத்து, திமுகவைச் சேர்ந்த ராஜீவ் காந்தி  எக்ஸ் தளத்தில் வெளியிட்ட பதிவு அரசியல் வட்டாரத்தில் பரபரப்பை ஏற்படுத்தியுள்ளது.

சேலத்தில் திமுக நடத்திய மாநாட்டில், ஐந்து லட்சம் இளைஞர்களுக்கு உணவு, தண்ணீர், தேநீர், நிழல் வசதிகளுடன் பாதுகாப்பான அனுபவத்தை வழங்கியதாகவும், முதலமைச்சர் மாலை 4 மணிக்கு பேசியபோதும் தொண்டர்களின் நலனுக்கு முக்கியத்துவம் கொடுக்கப்பட்டதாகவும் அந்தப் பதிவு குறிப்பிடுகிறது. இதனை, தமிழக வெற்றிக் கழகத்தின் அணுகுமுறையுடன் ஒப்பிட்டு, தொண்டர்களுக்கு அடிப்படை வசதிகள் கூட செய்யப்படவில்லை என்று கடுமையாக விமர்சிக்கப்பட்டுள்ளது.

குறிப்பாக, மாநாட்டில் தடுப்பு வேலிகளில் க்ரீஸ் தடவப்பட்டு, தொண்டர்கள் சிரமத்திற்கு உள்ளானதாகவும், மாற்று அரசியல் பேசுபவர் கேரவனுக்குள் ஒளிந்து கொண்டு மக்களைச் சந்திக்காமல் படம் காட்டுவதாகவும் குற்றம்சாட்டப்பட்டுள்ளது. மேலும், “தியேட்டர் இருக்கைகளில் க்ரீஸ் தடவியிருந்தால், ரசிகர்கள் உங்கள் உண்மை முகத்தை முன்பே புரிந்து கொண்டிருப்பார்கள்” என்று கிண்டலாகவும் விமர்சித்துள்ளார்.

இந்தப் பதிவு, தமிழக அரசியல் களத்தில் கட்சிகளுக்கு இடையேயான வார்த்தைப் போரை மேலும் தீவிரப்படுத்தியுள்ளது. தமிழக வெற்றிக் கழகம் இந்த விமர்சனங்களுக்கு எவ்வாறு பதிலளிக்கும் என எதிர்பார்க்கப்படுகிறது.