தமிழக சட்டசபை தேர்தல் நெருங்கி வரும் வேளையில், ஈரோடு மாவட்டம் அரியப்பம்பாளையத்தில் நடைபெற்ற பிரசார பொதுக்கூட்டத்தில் அதிமுக பொதுச்செயலாளர் எடப்பாடி பழனிசாமி கலந்துகொண்டு உரையாற்றினார்.

அப்போது பேசிய அவர், அதிமுக யாருக்கும் அடிபணியாத ஒரு சுதந்திரமான மற்றும் தன்மானமுள்ள கட்சி என்று பெருமிதத்துடன் தெரிவித்தார். மேலும், திமுக அரசு தமிழகத்தில் சட்டம் ஒழுங்கை பாதுகாக்கத் தவறிவிட்டதாகவும், போதை கலாசாரம் அதிகரித்துவிட்டதாகவும் அவர் கடுமையாக விமர்சித்தார்.

முதல்வர் ஸ்டாலின் மக்களைப் பற்றிச் சிந்திக்காமல் விளம்பரத்தை மட்டுமே நம்பி ஆட்சி செய்வதாக அவர் குற்றம் சாட்டினார்.

திமுக கூட்டணி தற்போது ஆட்டம் கண்டுள்ளதாகத் தெரிவித்த எடப்பாடி பழனிசாமி, தேர்தலுக்காகத் திமுக புதிய வாக்குறுதிகளை அளிப்பதாகவும் ஆனால் எதையும் நிறைவேற்றவில்லை என்றும் கூறினார். அதிமுக மீண்டும் ஆட்சிக்கு வந்தால் மகளிருக்கு மாதம் 2,000 ரூபாய் வழங்கப்படும் என்றும், ஆண்களுக்கும் பேருந்துகளில் இலவச பயணத் திட்டம் நீட்டிக்கப்படும் என்றும் அதிரடி அறிவிப்புகளை வெளியிட்டார்.

அத்துடன் குடும்ப அட்டைதாரர்களுக்கு ஆண்டுக்கு மூன்று இலவச சிலிண்டர்கள் மற்றும் மாணவர்களின் கல்விக்கடன் தள்ளுபடி செய்யப்படும் என்ற முக்கிய வாக்குறுதிகளையும் அவர் முன்வைத்தார்.

திமுக ஆட்சியில் மணல் கொள்ளை மற்றும் டெண்டர் ஊழல்கள் தாராளமாக நடப்பதாகக் குறிப்பிட்ட அவர், கடந்த ஐந்தாண்டுகளில் மக்களைக் கடன்காரர்களாக மாற்றியதைத் தவிர திமுக எதையும் சாதிக்கவில்லை என்று பேசினார்.

அதிமுக ஆட்சியில் விவசாயிகள் செழிப்பாக இருந்ததை நினைவுகூர்ந்த அவர், முதியோர் உதவித்தொகை 2,000 ரூபாயாக உயர்த்தப்படும் என்றும் சிறுபான்மையின பெண்களுக்கு வட்டியில்லா கடன் வழங்கப்படும் என்றும் உறுதியளித்தார்.

இவ்வாறாகப் பல்வேறு மக்கள் நலத் திட்டங்களை அறிவித்து தனது தேர்தல் பிரசாரத்தை அவர் தீவிரப்படுத்தியுள்ளார்.