கோவை தெற்கு தொகுதி எம்.எல்.ஏ-வும், பா.ஜ.க தேசிய மகளிர் அணி தலைவருமான வானதி சீனிவாசன், தமிழகத்தில் நிலவும் அரசியல் சூழல் குறித்து செய்தியாளர்களிடம் பேசுகையில் தி.மு.க அரசை கடுமையாக விமர்சித்துள்ளார். குறிப்பாக, திருப்பரங்குன்றம் தீபத்தூணில் தீபம் ஏற்ற விடாமல் தடுத்ததன் மூலம் இந்துக்களின் உணர்வுகளை தி.மு.க அரசு புண்படுத்தியுள்ளதாக அவர் குற்றம் சாட்டினார்.
மேலும் ஆன்மிக கலாச்சாரமே தமிழர்களின் அடையாளம் என்று குறிப்பிட்ட அவர், திராவிட மாடல் என்ற பெயரில் தி.மு.க அரசு அந்த அடையாளத்தை சிதைக்க முயற்சிப்பதாகவும், நீதிமன்ற உத்தரவையும் மதிக்காமல் சட்டம் ஒழுங்கு என்ற பொய் காரணத்தைக் கூறி ஆன்மிக நிகழ்வுகளைத் தடுப்பதாகவும் சாடினார்.
இதனால் தமிழக அரசியலில் புதிதாக களம் கண்டுள்ள நடிகர் விஜய் குறித்து கருத்து தெரிவித்த வானதி சீனிவாசன், விஜய் மேடை ஏறி வசனம் பேசலாம் அல்லது பெரிய அளவில் கூட்டத்தைக் கூட்டிக் காட்டலாம், ஆனால் அது வாக்குகளாக மாறாது என்று கூறினார்.
இந்நிலையில் தி.மு.க-வின் ஊழல் குறித்து முதலமைச்சர் ஸ்டாலின் பேசுவது வேடிக்கையாக இருப்பதாகவும், ஊழல் அமைச்சர்களைப் பக்கத்தில் வைத்துக்கொண்டே அவர் மற்றவர்களை விமர்சிப்பதாகவும் தெரிவித்தார். இறுதியில், தி.மு.க கூட்டணியை வீழ்த்தும் ஆற்றல் தேசிய ஜனநாயகக் கூட்டணிக்கு மட்டுமே உள்ளது என்றும், வரும் காலங்களில் மக்கள் ஆதரவுடன் மிகப்பெரிய வெற்றியைப் பெறும் என்றும் அவர் உறுதிபடத் தெரிவித்தார்.
