இன்றைய டிஜிட்டல் உலகில் கைபேசிகளில் ரீல்ஸ் மற்றும் குறும்பட வீடியோக்களைப் பார்க்கும் பழக்கம் அதிகரித்து வரும் நிலையில், 5 வயதிற்குட்பட்ட குழந்தைகளின் மூளை வளர்ச்சிக்கும் கற்றல் திறனுக்கும் அது கடுமையான பாதிப்புகளை ஏற்படுத்துவதாக மருத்துவ ஆய்வுகள் எச்சரிக்கின்றன. ராய்பூர் எய்ம்ஸ் மருத்துவமனையின் ஆய்வின்படி, இந்தியாவில் 5 வயதிற்குட்பட்ட சிறுவர்கள் தினமும் சராசரியாக 2 மணி நேரத்திற்கும் மேலாகச் சாதனத் திரைகளின் முன்னால் செலவிடுகின்றனர்.

உலக சுகாதார நிறுவனம் மற்றும் இந்தியக் குழந்தைகள் நல மருத்துவக் கழகத்தின் வழிகாட்டுதல்களின்படி, 2 வயது வரையிலான பிஞ்சுகளுக்குத் திரை நேரத்தை முற்றிலுமாகத் தவிர்க்க வேண்டும். 2 முதல் 5 வயது வரையிலான பிள்ளைகளுக்குப் பெற்றோர் கண்காணிப்பில் அதிகபட்சமாக தினமும் ஒரு மணி நேரம் மட்டுமே அனுமதிக்கப்பட வேண்டும் என்ற விதிமுறை வலியுறுத்தப்படுகிறது.

சிறு வயதிலேயே வீடியோக்களைத் தொடர்ந்து பார்த்து வரும் குழந்தைகளுக்குப் பேசும் திறனில் தாமதம், புரிந்துகொள்வதில் தடுமாற்றம் மற்றும் கவனச்சிதறல் போன்ற பல்வேறு சிக்கல்கள் உருவாகின்றன. மேலும், திரையில் இருந்து வரும் நீல நிற ஒளிக்கதிர்கள் மெலட்டோனின் சுரப்பைப் பாதித்து, குழந்தைகளின் தூக்கச் சுழற்சியையும் கண் பார்வையையும் கடுமையாகப் பாதிக்கச் செய்கிறது.

சாதனப் பயன்பாட்டினால் உடற்பயிற்சியும் வெளிப்புற விளையாட்டுகளும் குறைவதுடன், கைபேசியைப் பிடுங்கும்போது அளவுக்கு அதிகமான கோபம், பிடிவாதம் மற்றும் அழுது அடம்பிடிக்கும் நடத்தை மாற்றங்களும் வெளிப்படுகின்றன. கற்றலுக்கு உதவும் சுவாரஸ்யமான ஆக்கப்பூர்வ விளையாட்டுகளில் ஆர்வம் குறைந்து, உடனடி சுவாரஸ்யம் தரும் குறும்பட வீடியோக்களுக்கு அடிமையாகும் நிலையும் இதனால் ஏற்படுகிறது.

இதனைத் தவிர்க்க 2 வயதிற்குட்பட்ட பிள்ளைகளுக்கு மொபைல் காட்டுவதை முற்றிலுமாக நிறுத்த வேண்டும். தூங்குவதற்கு ஒரு மணி நேரத்திற்கு முன்பே சாதனங்களை ஒதுக்கி வைத்துவிட்டு, பெற்றோர் நேரடி உரையாடலில் ஈடுபட வேண்டும். கதை சொல்லுதல், புத்தக வாசிப்பு மற்றும் வெளிப்புற விளையாட்டுகளை ஊக்குவிப்பதோடு, பெற்றோரும் குழந்தைகளுக்கு முன்மாதிரியாகத் தங்களது மொபைல் பயன்பாட்டைக் குறைத்துக் கொள்ள வேண்டும்.