டெல்லியில்  பகுதியில் நடைபெற்றதாகக் கூறப்படும் சாலை விபத்து வழக்கில் திடீர் திருப்பம் ஏற்பட்டுள்ளது. உயிரிழந்த தீபக் என்பவரை திட்டமிட்டு கொலை செய்திருக்கலாம் என்ற கோணத்தில் போலீஸார் விசாரணை நடத்தி வருகின்றனர். போலீஸ் தகவலின்படி, ஜூலை 2-ஆம் தேதி வெள்ளை நிற ஹூண்டாய் காரை பயன்படுத்தி தீபக்கின் ஸ்கூட்டி மீது விபத்து  ஏற்படுத்தப்பட்டதாக கூறப்படுகிறது. அந்த முயற்சியில் அவர் உயிர் தப்பிய நிலையில், பின்னர் மீண்டும் அவரை குறிவைத்ததாக விசாரணையில் தெரியவந்துள்ளதாக போலீஸார் தெரிவித்துள்ளனர்.

ஜூலை 16-ஆம் தேதி  சாலையோரம் தீபக் உயிரிழந்த நிலையில் கண்டெடுக்கப்பட்டார். அவரது ஸ்கூட்டி சம்பவ இடத்திலிருந்து சுமார் 100 மீட்டர் தொலைவில் கிடந்ததாக போலீஸார் தெரிவித்துள்ளனர். சம்பவ இடத்தின் சூழ்நிலை மற்றும் உடலில் காணப்பட்ட காயங்களைப் பார்த்த போலீஸாருக்கு இது சாதாரண விபத்து அல்ல என்ற சந்தேகம் ஏற்பட்டதாக கூறப்படுகிறது. இதையடுத்து முந்தைய விபத்து தொடர்பான தகவல்களையும் போலீஸார் ஆய்வு செய்தனர். அதன் மூலம் வழக்கின் விசாரணை வேறு கோணத்தில் நகர்ந்தது.

போலீஸாரின் விசாரணையின்படி, முதல் சம்பவத்தில் பயன்படுத்தப்பட்டதாகக் கூறப்படும் காரை சாகர் என்ற நபர் ஓட்டியதாக தெரியவந்துள்ளது. அவரிடம் நடத்தப்பட்ட விசாரணைக்குப் பிறகு, ஜூலை 16-ஆம் தேதி சம்பவத்தில் பயன்படுத்தப்பட்டதாகக் கூறப்படும் ஸ்கார்பியோ வாகனத்தையும் போலீஸார் கண்டுபிடித்தனர். தீபக்குக்கும் பவன் என்கிற ஜக்பால் தாபாஸ் என்பவருக்கும் ஏற்கெனவே இருந்த பகை காரணமாக இந்தச் சம்பவம் நடந்திருக்கலாம் என போலீஸார் சந்தேகிக்கின்றனர். இதுதொடர்பான பல்வேறு கோணங்களில் விசாரணை தொடர்ந்து நடைபெற்று வருகிறது.

இந்த வழக்கில் பவன் என்கிற ஜக்பால் தாபாஸ், சாகர் என்கிற காலா, அதுல், சாஹில் மற்றும் பிரின்ஸ் என்கிற டில்லு ஆகிய 5 பேர் கைது செய்யப்பட்டுள்ளதாக போலீஸார் தெரிவித்துள்ளனர். சம்பவத்துடன் தொடர்புடையதாகக் கூறப்படும்  இரண்டு வாகனங்களும், இரண்டு செல்போன்களும் பறிமுதல் செய்யப்பட்டுள்ளதாக தெரிவிக்கப்பட்டுள்ளது. கைது செய்யப்பட்டவர்களிடம் போலீஸார் தொடர்ந்து விசாரணை நடத்தி வருகின்றனர். ஆரம்பத்தில் சாலை விபத்தாகத் தெரிந்த இந்த வழக்கில், திட்டமிட்ட கொலை என்ற சந்தேகத்தின் அடிப்படையில் விசாரணை நடைபெறுவது பெரும் பரபரப்பை ஏற்படுத்தியுள்ளது.