கேரள மாநிலம் மலப்புரத்தைச் சேர்ந்த அப்துல் மஜீத் என்பவர், அரசுப் பணியில் சேருவதற்காக 18 ஆண்டுகளுக்கு முன்பு கேரள அரசுப் பணியாளர் தேர்வாணையம் நடத்திய தேர்வை எழுதி தேர்ச்சி பெற்றார். அரபு மொழி ஆசிரியருக்கான இந்தப் பணிக்கு அவர் தகுதியானவராகத் தேர்ந்தெடுக்கப்பட்டிருந்தும், நிர்வாகத் தாமதங்களால் நீண்ட காலமாக அவருக்கு பணி நியமன ஆணை வழங்கப்படவில்லை.

தற்போது 18 ஆண்டுகளுக்குப் பிறகு அவருக்கு அந்தப் பணிக்கான நியமன ஆணை கிடைத்தாலும், அவர் தனது 60 வயதை எட்டி ஓய்வுபெறும் வயதை அடைந்துவிட்டதால், அந்த வாய்ப்பு அவருக்குப் பயனின்றிப் போனது பெரும் சோகத்தை ஏற்படுத்தியுள்ளது. இந்த நிர்வாகத் குளறுபடியால் தனது அரசு வேலை கனவு சிதைந்ததை எண்ணி மஜீத் மிகுந்த மனவேதனை அடைந்துள்ளார்.

இருப்பினும், தனது பள்ளிச் சான்றிதழில் உள்ள பிறந்த தேதியில் பிழை இருப்பதாகவும், அதைச் சரிசெய்தால் இன்னும் ஓராண்டு காலம் அரசுப் பணியில் சேர வாய்ப்பு கிடைக்கும் என்றும் அவர் நம்பிக்கை தெரிவித்துள்ளார். இதற்காக அவர் கல்வித்துறை அமைச்சரிடம் முறையிட்டுள்ள நிலையில், இவ்வளவு நீண்ட கால தாமதத்திற்குப் பொறுப்பான நிர்வாகத்தின் அலட்சியம் பொதுமக்களிடையே பெரும் விமர்சனத்திற்கு உள்ளாகியுள்ளது.