தமிழக வேளாண்மைத் துறை அமைச்சர் எம்.ஆர்.கே. பன்னீர்செல்வம், வட மாநிலத்தவர்கள் குறித்துப் பேசிய கருத்துகள் சமூக வலைதளங்களில் வெளியாகி பெரும் சர்ச்சையை ஏற்படுத்தியுள்ளன. ஒரு நிகழ்ச்சியில் பேசிய அவர், ஹிந்தி மட்டுமே படிப்பதால்தான் வட மாநிலத்தவர்கள் பிழைப்புத் தேடி தமிழகத்திற்கு வந்து டேபிள் துடைப்பதற்கும், பானிபூரி விற்பதற்கும் ஆளாகிறார்கள் என்ற தொனியில் பேசியதாகக் கூறப்படுகிறது. அமைச்சரின் இந்தப் பேச்சு வட இந்தியர்களிடையே அதிருப்தியை ஏற்படுத்தியுள்ள நிலையில், இது குறித்த வீடியோவை வெளியிட்டுள்ள பாஜக எம்.எல்.ஏ நயினார் நாகேந்திரன், அமைச்சரின் கருத்துக்குக் கடும் எதிர்ப்பு தெரிவித்துள்ளார்.
திமுக ஆட்சியில் வட இந்தியர்கள் மீதான வெறுப்புணர்வும், தாக்குதல்களும் அதிகரித்து வருவதாகக் குற்றம் சாட்டியுள்ள நயினார் நாகேந்திரன், இது போன்ற பொறுப்பற்ற பேச்சுகள் சமூக நல்லிணக்கத்தைப் பாதிக்கும் என்று எச்சரித்துள்ளார். வட மாநிலத்தவர்களை இழிவுபடுத்தும் வகையில் பேசிய அமைச்சர் எம்.ஆர்.கே. பன்னீர்செல்வம் உடனடியாக மன்னிப்பு கோர வேண்டும் என்றும் அவர் வலியுறுத்தியுள்ளார். ஏற்கனவே தமிழகத்தில் வட மாநிலத் தொழிலாளர்கள் விவகாரம் அடிக்கடி விவாதப் பொருளாகி வரும் நிலையில், ஒரு அமைச்சரே இவ்வாறு பேசியிருப்பது அரசியல் களத்தில் பெரும் பரபரப்பை உண்டாக்கியுள்ளது.
