ஈரான் மீதான ராணுவ நடவடிக்கைகளுக்குப் பிறகு கச்சா எண்ணெய் விலை கணிசமாகக் குறையும் என்று அமெரிக்க அதிபர் டொனால்டு டிரம்ப் நம்பிக்கை தெரிவித்துள்ளார். இஸ்ரேல் மற்றும் அமெரிக்கா இணைந்து ஈரானின் அணுசக்தி மையங்கள் மற்றும் ராணுவ தளங்கள் மீது நடத்திய தாக்குதலைத் தொடர்ந்து, மத்திய கிழக்கு பிராந்தியத்தில் பெரும் பதற்றம் நிலவி வருகிறது.
இந்த போர் சூழல் காரணமாக சர்வதேச சந்தையில் எண்ணெய் விலை தற்காலிகமாக உயர்ந்துள்ள நிலையில், தற்போதைய சூழலில் எண்ணெய் விலை சிறிது காலத்திற்கு அதிகமாகவே இருக்கும் என்றும், ஆனால் நிலைமை சீரான பிறகு முன்னெப்போதையும் விட விலை குறையும் என்றும் டிரம்ப் குறிப்பிட்டுள்ளார்.
மேலும் அமெரிக்காவின் இந்த நடவடிக்கைக்கு அந்நாட்டில் வாழும் ஈரானிய மக்கள் பெரும் ஆதரவு தெரிவித்து வருவதாக டிரம்ப் சுட்டிக்காட்டினார். குறிப்பாக லாஸ் ஏஞ்சல்ஸ் போன்ற நகரங்களில் மக்கள் வீதிகளில் இறங்கி மகிழ்ச்சியை வெளிப்படுத்தி வருவதாகவும், இது செய்யப்பட வேண்டிய ஒரு அவசியமான நடவடிக்கை என அவர்கள் கருதுவதாகவும் அவர் கூறினார்.
இந்நிலையில் மத்திய கிழக்கில் நிலவும் போர் பதற்றத்தால் உலகப் பொருளாதாரம் பாதிக்கப்படாமல் இருக்கவும், எரிபொருள் விலையை மீண்டும் கட்டுக்குள் கொண்டு வரவும் அமெரிக்கா தொடர்ந்து முயற்சிகளை மேற்கொள்ளும் என்பதை டிரம்ப்பின் இந்த அறிக்கை உறுதிப்படுத்துகிறது.
