கோவையில் அறிவியல் அறிஞர் ஜி.டி. நாயுடுவின் உருவச்சிலையை முதல்வர் ஸ்டாலின் திறந்து வைத்த நிலையில், அந்த விழாவில் பங்கேற்ற திராவிடர் கழகத் தலைவர் கி. வீரமணி செய்தியாளர்களிடம் பேசியது இப்போது சமூக வலைதளங்களில் புயலைக் கிளப்பியுள்ளது. குறிப்பாக, நடிகர் விஜய்யை “பாஜகவின் பி-டீம்” என்று அவர் கடுமையாக விமர்சித்துள்ளார். “தனது சொந்தத் திரைப்படங்களுக்கு வரும் பிரச்சனைகளுக்குக் கூட வாயைத் திறக்காத விஜய், பாஜகவின் வருமானவரித்துறை மற்றும் அமலாக்கத்துறை மிரட்டல்களுக்கு அஞ்சி மௌனம் காக்கிறார். கொள்கைப் பிடிப்பு இல்லாதவர்களிடம் இருந்து எதையுமே எதிர்பார்க்க முடியாது” என விஜய்யின் அரசியல் நிலைப்பாட்டை அவர் நேரடியாகத் தாக்கியுள்ளார்.
மேலும், சமீபகாலமாக பாஜகவை விமர்சிக்க விஜய் தயங்குவதைச் சுட்டிக்காட்டிய வீரமணி, “மோடி அரசு மகளிர் தினப் பரிசாக சிலிண்டர் விலையை உயர்த்தியுள்ளது, பெட்ரோல் விலை உயர்வால் மக்கள் பாதிக்கப்பட்டுள்ளனர்; இதைப் பற்றி விஜய் ஏன் பேசவில்லை?” என்று கேள்வி எழுப்பினார். இதே வேளையில், ஜி.டி. நாயுடுவின் பெயரில் உள்ள சாதி அடையாளம் குறித்த சர்ச்சைக்குப் பதிலளித்த அவர், “அதைச் சாதியாகப் பார்க்கக்கூடாது, அது பெயரோடு இணைந்துவிட்ட ஒன்று” என்று விளக்கம் அளித்தார். வரும் சட்டமன்றத் தேர்தலில் திராவிட மாடல் ஆட்சி மீண்டும் மலர்வது உறுதி எனத் தெரிவித்த வீரமணி, விஜய்யின் அரசியல் நகர்வுகள் பாஜகவிற்கு ஆதரவாகவே இருப்பதைச் சாடினார்.
