நொய்டா பகுதியில் உள்ள ஒரு அடுக்குமாடி குடியிருப்பு மின் தூக்கியில், மூதாட்டி ஒருவரிடம் சங்கிலி பறிக்க முயன்ற அதிர்ச்சியூட்டும் சம்பவம் பெரும் பரபரப்பை ஏற்படுத்தியுள்ளது. தலைக்கவசம் அணிந்த மர்ம நபர் ஒருவர், மின் தூக்கியில் தனியாக இருந்த அந்த மூதாட்டியின் தங்கச் சங்கிலியைப் பறிக்கத் துணிச்சலாக முயன்றார்.

இருப்பினும், அந்த மூதாட்டி சற்றும் அஞ்சாமல் சத்தமிட்டுப் போராடியதால், அந்த நபர் பயந்து அங்கிருந்து வெறும் கையுடன் தப்பியோடினார். இந்தச் சம்பவம் அங்கிருந்த கண்காணிப்பு கேமராவில் பதிவாகி, தற்போது சமூக வலைதளங்களில் வைரலாகி வருகிறது.

“>

இந்தச் சம்பவம் அந்த குடியிருப்பில் வசிக்கும் மக்களிடையே கடும் அதிருப்தியையும் அச்சத்தையும் ஏற்படுத்தியுள்ளது. பராமரிப்புக் கட்டணமாக அதிகத் தொகை வசூலிக்கப்பட்ட போதிலும், குடியிருப்பு வளாகத்தில் போதிய பாதுகாப்பு வசதிகள் இல்லை என்று குடியிருப்பாளர்கள் குற்றம் சாட்டுகின்றனர்.

குறிப்பாக, மூத்த குடிமக்களின் பாதுகாப்பு கேள்விக்குறியாக உள்ளதாகவும், பாதுகாப்புப் பணியாளர்கள் மற்றும் நிர்வாகத்தின் அலட்சியமே இதுபோன்ற குற்றங்கள் நடக்கக் காரணமாக இருப்பதாகவும் அவர்கள் வேதனை தெரிவித்துள்ளனர். டெல்லி மற்றும் அதன் சுற்றுவட்டாரப் பகுதிகளில் இது போன்ற தொடர் சங்கிலி பறிப்புச் சம்பவங்கள் மக்கள் மத்தியில் பெரும் கவலையை ஏற்படுத்தியுள்ளன.