டி20 உலகக் கோப்பையில் இன்று (பிப்ரவரி 26) நடைபெறவுள்ள ஜிம்பாப்வேக்கு எதிரான மிக முக்கியமான ‘சூப்பர் 8’ போட்டிக்கு முன்னதாக, இந்திய அணியின் ஆடும் லெவனில் அதிரடி மாற்றங்கள் இருக்கும் என பேட்டிங் பயிற்சியாளர் சிதான்ஷு கோடக் தெரிவித்துள்ளார்.

குறிப்பாக, தொடக்க வீரர் அபிஷேக் சர்மா கடந்த நான்கு போட்டிகளில் ஹாட்ரிக் டக் அவுட் உட்பட வெறும் 15 ரன்கள் மட்டுமே எடுத்து ஃபார்ம் அவுட்டில் இருப்பதால், அவருக்குப் பதிலாக சஞ்சு சாம்சன் அணியில் சேர்க்கப்பட வாய்ப்புள்ளதாகத் தெரிகிறது.

இடது கை ஆட்டக்காரர்கள் வரிசையாக இருப்பதும், ஆரம்பத்திலேயே விக்கெட்டுகளை இழப்பதும் அணி நிர்வாகத்திற்குச் சவாலாக இருப்பதால், இந்த மாற்றங்கள் குறித்து தீவிரமாக ஆலோசிக்கப்பட்டு வருகிறது.

சஞ்சு சாம்சன் வலைப்பயிற்சியில் தீவிரமாக ஈடுபட்டது அவர் அணியில் இடம் பிடிப்பதை உறுதி செய்வது போல் அமைந்தாலும், பயிற்சியாளர் கோடக் அதை இப்போதே உறுதிப்படுத்த மறுத்துவிட்டார்.

அபிஷேக் சர்மாவுக்கு மீண்டும் ஒரு வாய்ப்பு வழங்கப்படுமா அல்லது திலக் வர்மாவுக்குப் பதில் சஞ்சு களம் இறங்குவாரா என்பது போட்டியின் போதுதான் தெரியவரும்.

சூர்யகுமார் யாதவ் தலைமையிலான இந்திய அணியில் ஹர்திக் பாண்ட்யா, அக்சர் படேல், பும்ரா போன்ற நட்சத்திர வீரர்கள் இடம்பெற்றுள்ள நிலையில், இந்த வாழ்வா-சாவா போட்டியில் வெற்றி பெற்று அடுத்த சுற்றுக்கு முன்னேற இந்திய அணி முனைப்புடன் உள்ளது.