தமிழகத்தில் புதிய அரசு பொறுப்பேற்றுள்ள நிலையில், நெல்லை மாநகராட்சி அலுவலகத்தில் உள்ள மேயர் அறையில் முன்னாள் முதல்வர்கள் கருணாநிதி, மு.க.ஸ்டாலின் ஆகியோரின் புகைப்படங்களுக்கு அருகில், தற்போதைய முதலமைச்சர் விஜய்யின் புகைப்படம் முறைப்படி வைக்கப்பட்டது. புதிய அரசின் வழிகாட்டுதலின்படி இந்த நடவடிக்கை எடுக்கப்பட்ட போதிலும், நெல்லை மாநகராட்சி மேயர் ராமகிருஷ்ணன் தனது வழக்கமான இருக்கையில் அமர்வதைத் தவிர்த்து வருகிறார். முதலமைச்சர் விஜய்யின் புகைப்படத்திற்கு நேர் கீழே உள்ள தனது அதிகாரப்பூர்வ மேயர் நாற்காலியில் அமர்ந்து பணியாற்ற அவர் தயக்கம் காட்டி வருவதாகக் கூறப்படுகிறது.

இதற்கு மாற்றாக, மேயர் ராமகிருஷ்ணன் அதே அறையின் மற்றொரு பகுதியில் போடப்பட்டுள்ள சோபாவில் அமர்ந்து தனது அன்றாடப் பணிகளை கவனித்து வருகிறார். தன்னைச் சந்திக்க வரும் கவுன்சிலர்கள் மற்றும் பொதுமக்களை அந்தச் சோபாவில் அமர்ந்தபடியே சந்தித்து, அவர்களின் கோரிக்கைகளை அவர் நிறைவேற்றி வருகிறார். அந்த சோபாவின் அருகே போடப்பட்டுள்ள சிறிய மேசையில் முன்னாள் முதலமைச்சர் மு.க.ஸ்டாலின் புகைப்படம், முன்னாள் துணை முதல்வர் உதயநிதி ஸ்டாலின் படம் மற்றும் கருணாநிதியின் சிறிய அளவிலான சிலை ஆகியவை வைக்கப்பட்டுள்ளன. முதலமைச்சர் விஜய்யின் புகைப்படம் இருக்கும் இருக்கையைத் தவிர்த்து, மேயர் சோபாவில் அமர்ந்து பணியாற்றும் இந்த வீடியோ காட்சிகள் தற்போது சமூக வலைதளங்களில் வெளியாகி பெரும் பரபரப்பை ஏற்படுத்தி, வைரலாகப் பரவி வருகின்றன.