உலக அளவில் அதிநவீன தொழில்நுட்பத்திற்கும், கடுமையான உழைப்புக்கும் பெயர் பெற்ற தென் கொரியாவின் கார்ப்பரேட் உலகம், வெளியிலிருந்து பார்ப்பதற்கு எவ்வளவு கவர்ச்சிகரமாகத் தோன்றுகிறதோ, அதற்குப் பின்னால் சொல்லப்படாத பல கொடூரமான வேலை கலாச்சார விதிகள் ஒளிந்துள்ளன.

தென் கொரியாவில் உள்ள நிறுவனம் ஒன்றில் பணியாற்றும் 31 வயது ஊழியர் ஒருவர், அங்குள்ள நிறுவனங்களில் எழுதப்படாத, ஆனால் அனைவரும் கண்டிப்பாகப் பின்பற்றி ஆக வேண்டிய 5 முக்கியக் கார்ப்பரேட் விதிகளைப் பற்றிச் சமூக வலைதளங்களில் வெளிப்படையாகப் பகிர்ந்துள்ளது பெரும் விவாதத்தைக் கிளப்பியுள்ளது.

அதில் முதன்மையான விதி என்னவென்றால், ஒரு ஊழியர் தன் சொந்த காரணங்களுக்காகத் தொடர்ந்து 3 நாட்களுக்கு மேல் விடுமுறை எடுக்கவே கூடாது என்பதாகும். அவ்வாறு எடுத்தால் அவர் வேலையின் மீது அக்கறையற்றவராகக் கருதப்பட்டு, நிறுவனத்தில் அவரது எதிர்காலமே கேள்விக்குறியாக்கப்படும் சூழல் நிலவுகிறது.

அதுமட்டுமன்றி, வேலை நேரம் முடிந்த பிறகும் மேலதிகாரி அலுவலகத்தை விட்டுப் புறப்படும் வரை கீழ்நிலை ஊழியர்கள் வீட்டிற்குச் செல்லக் கூடாது என்ற எழுதப்படாத விதியும் அங்கு தீவிரமாகப் பின்பற்றப்படுகிறது. அதிகாரப்பூர்வமாக வேலை நேரம் முடிந்தாலும், பாஸ் உட்கார்ந்திருக்கும் வரை ஊழியர்களும் கணினி முன்னால் அமர்ந்திருக்க வேண்டிய கட்டாயம் உள்ளது.

அதேபோல, வார இறுதி நாட்களிலோ அல்லது வேலை நேரத்திற்குப் பிறகோ பாஸ் அளிக்கும் மது விருந்துகளில் ஊழியர்கள் கட்டாயம் கலந்துகொள்ள வேண்டும்; அதைத் தவிர்ப்பது நிறுவனத்திற்குச் செய்யும் துரோகமாகவே பார்க்கப்படுகிறது. தனிப்பட்ட வாழ்க்கைக்கும், வேலைக்கும் இடையேயான இடைவெளி முற்றிலுமாக அழிக்கப்படும் இந்தச் சூழல், ஊழியர்களுக்குக் கடுமையான மன அழுத்தத்தைக் கொடுக்கிறது.

விடுமுறை நாட்களிலும்கூட மேலதிகாரியிடமிருந்து வரும் மின்னஞ்சல்கள் மற்றும் செய்திகளுக்கு உடனுக்குடன் பதிலளிக்க வேண்டும் என்பதும், ஆபீஸில் மூத்த ஊழியர்களுக்கு முன்னால் உணவு உண்பது அல்லது ஓய்வெடுப்பதில் இருக்கும் கட்டுப்பாடுகளும் தென் கொரிய கார்ப்பரேட் உலகின் கொடூர முகத்தை வெளிச்சம்போட்டுக் காட்டியுள்ளன.

தொழில் நுட்பத்திலும் பொருளாதாரத்திலும் அதிவேகமாக வளர்ந்து வரும் ஒரு நாட்டில், மனித உழைப்பும் மனநலமும் எவ்வாறு சுரண்டப்படுகின்றன என்பதை இந்தச் சம்பவம் உலகிற்குத் தோலுரித்துக் காட்டியுள்ளது. இந்தப் பதிவு வெளியானதைத் தொடர்ந்து, உலகின் பல்வேறு பகுதிகளைச் சேர்ந்த கார்ப்பரேட் ஊழியர்களும் தென் கொரியாவின் இந்த விசித்திரமான மற்றும் கடுமையான பணிச்சூழலைக் கண்டு தங்களது அதிர்ச்சியையும் கண்டனத்தையும் பதிவு செய்து வருகின்றனர்.