நாடு முழுவதும் மனித நேயம் மங்கும் சம்பவங்கள் தினமும் வெளியாகிக் கொண்டே இருக்கின்றன.

சொந்த மகளின் மீது தந்தை பாலியல் வன்முறை, அண்ணன் தங்கையிடம் காட்டும் அசிங்கம், காதலனுக்காக கணவனை கொன்ற மனைவி, காதலியுடன் சேர்ந்து மனைவியை கொன்ற கணவன், சொத்து சண்டைக்காக சகோதரன் மீது சகோதரன் காட்டும் கொடூரம் என அடிக்கடி நடக்கும் கொலை சம்பவங்கள் சமூகத்தை உலுக்கிக் கொண்டிருக்கின்றன. அதில் சமீபத்தில் ராஜஸ்தான் மாநிலம், அல்வார் மாவட்டத்தில் நடந்த ஒரு கொடூரம் தற்போது வைரலாகி மக்களின் கவனத்தை ஈர்த்துள்ளது.

அல்வாரின் கிஷன்கர்ஹ் பாஸ் பகுதியில் உள்ள ஆதர்ஷ் காலனியில், ஒரு வாடகை வீட்டின் மாடியில் இருந்த நீல நிற டிரம்மிலிருந்து துர்நாற்றம் வீசியது. அதனால் சந்தேகமடைந்த அக்கம் பக்கத்தினர் போலீசுக்கு தகவல் அளித்தனர். போலீசார் சம்பவ இடத்துக்கு விரைந்து சென்று டிரம்மைத் திறந்தபோது, ஒரு ஆண் சடலம் உள்ளே இருப்பது தெரியவந்தது.

உடல் முற்றிலும் கெட்ட நிலையில் இருந்ததால் அதிர்ச்சி பரவியது. விசாரணையில், அந்த சடலம் அந்த வீட்டில் வசித்த ரூபாய் சம்பாதித்து கொடுத்து குடும்பத்தை காத்துவந்த  ஒருவருடையது என்றும், அவர் கொடூரமாகக் கொல்லப்பட்டதாக போலீசார் கண்டறிந்தனர்.

போலீசார் நடத்திய ஆரம்ப விசாரணையில், அந்த நபரை அவரது மனைவி தனது காதலனுடன் சேர்ந்து திட்டமிட்டு கொலை செய்தது தெரியவந்தது. இருவரும் தற்போது போலீசாரால் கைது செய்யப்பட்டுள்ளனர். மேலும், அந்த தம்பதியருக்கு இருந்த மூன்று சிறு குழந்தைகளும் பாதுகாப்பாக காவல்துறையினரால் காப்பாற்றப்பட்டுள்ளனர்.

இந்த கொடூரச் சம்பவத்தால் உள்ளூர் மக்கள் அதிர்ச்சியில் மூழ்கியுள்ளனர். “கணவனை கொன்று டிரம்மில் சுமந்து போடுவது எவ்வளவு கொடுமை?” எனக் கேள்வி எழுப்பும் நிலையில், இந்த வழக்கின் முழு உண்மைகளை கண்டறிய பல விசாரணைக் குழுக்கள் பணியாற்றி வருகின்றன. இச்சம்பவம் தற்போது சமூக ஊடகங்களில் பெரும் பரபரப்பை ஏற்படுத்தியுள்ளது.