திருவள்ளூர் மாவட்டம் பெரியபாளையம் அருகே மஞ்சங்கரணையிலுள்ள தனியார் இறால் பதப்படுத்தும் தொழிற்சாலையில் ஏற்பட்ட பயங்கர அம்மோனியா வாயு கசிவு விபத்தில் 7 தொழிலாளர்கள் உயிரிழந்த சம்பவத்திற்கு, தமிழக ஆளுநர் அர்லேகர் தனது ஆழ்ந்த இரங்கலையும் அஞ்சலியையும் தெரிவித்துள்ளார். ​இதுதொடர்பாக ஆளுநர் மாளிகை வெளியிட்டுள்ள அதிகாரப்பூர்வ இரங்கல் செய்தியில், “திருவள்ளூர் இறால் பதப்படுத்தும் தொழிற்சாலையில் ஏற்பட்ட நச்சு வாயு கசிவு காரணமாக 7 தொழிலாளர்கள் உயிரிழந்த செய்தி கேட்டு மிகுந்த வேதனையடைந்தேன்.

இந்த கொடூர விபத்தில் தங்களது அன்பிற்குரியவர்களை இழந்து வாடும் குடும்பத்தினருக்கு எனது ஆழ்ந்த இரங்கலைத் தெரிவித்துக் கொள்கிறேன். பாதிக்கப்பட்ட குடும்பங்களுக்கு இந்த பேரிழப்பைத் தாங்கிக் கொள்ளும் தைரியமும், மன வலிமையும் கிடைக்க இறைவனைப் பிரார்த்திக்கிறேன். மேலும், இந்த நச்சு வாயு கசிவால் பாதிக்கப்பட்டு சென்னை ஸ்டான்லி மருத்துவமனையில் அனுமதிக்கப்பட்டு சிகிச்சையில் உள்ள தொழிலாளர்கள் அனைவரும் விரைவில் முழு குணமடைந்து வீடு திரும்ப வேண்டும் என்றும் பிரார்த்திக்கிறேன்” என்று ஆளுநர் அர்லேகர் மிகவும் உருக்கமாகத் தெரிவித்துள்ளார்.

தேசிய பேரிடர் மீட்புக்குழுவினர் (NDRF) விபத்து நடந்த இடத்தில் தீவிர ஆய்வில் ஈடுபட்டு வரும் வேளையில், ஆளுநரின் இந்த இரங்கல் செய்தி சமூக வலைதளங்களில் வைரலாகி வருகிறது.