மகாராஷ்டிரா மாநிலம் டோம்பிவலி பகுதியில் சுயதொழில் செய்து நேர்மையான முறையில் வாழ்க்கையை நடத்தி வரும் ஒரு பெண் உணவக உரிமையாளருக்கு நேர்ந்த கொடூரச் சம்பவம் அப்பகுதி மக்களிடையே பெரும் அதிர்ச்சியையும் கொந்தளிப்பையும் ஏற்படுத்தியுள்ளது.

வழக்கம்போல தன் உணவகத்தில் வாடிக்கையாளர்களுக்குச் சேவை வழங்கி வந்த அந்தப் பெண்ணிடம், போதையில் வந்த மூன்று நபர்கள் சட்ட விரோதமாக உணவகத்திற்குள்ளேயே அமர்ந்து மது அருந்த முயன்றுள்ளனர். உணவகத்தின் அமைதியையும், அங்கு வரும் மற்ற குடும்பங்களின் பாதுகாப்பையும் கருத்தில் கொண்டு, அந்தப் பெண் தொழிலதிபர் மிகவும் நிதானமாக உணவகத்திற்குள் மது அருந்த அனுமதி இல்லை என்று கூறி அவர்களை வெளியேற அறிவுறுத்தியுள்ளார்.

ஆனால், போதை தலைக்கேறிய அந்த மூவரும் ஒரு பெண்ணாக இருந்து கொண்டு தங்களைத் தட்டிக் கேட்கிறாரா என்ற ஆணாதிக்கக் கொழுப்பிலும் போதை வெறியிலும் உடனடியாக அவருடன் தகராறில் ஈடுபட்டுள்ளனர். வாக்குவாதம் முற்றிய நிலையில், கண்மூடித்தனமாக அந்த பெண் ஹோட்டல் உரிமையாளர் மீது தாக்குதல் நடத்தத் தொடங்கியுள்ளனர்.

உணவகத்தில் இருந்த பொருட்களைச் சேதப்படுத்தியதோடு மட்டுமல்லாமல், தடுத்த அந்தப் பெண்ணை கொடூரமான முறையில் தாக்கி காயப்படுத்தியுள்ளனர். ஒரு பெண் தொழிலதிபர் மீது பொதுமக்கள் நடமாட்டம் உள்ள பகுதியில் வைத்து நடத்தப்பட்ட இந்த வன்முறைச் சம்பவம், தொழில்துறையில் பெண்களுக்கு இருக்கும் பாதுகாப்பை மீண்டும் கேள்விக்குறியாக்கியுள்ளது.

இச்சம்பவம் குறித்துத் தகவலறிந்த காவல்துறையினர் உடனடியாக சம்பவ இடத்திற்கு விரைந்து வந்து, காயமடைந்த பெண்மணியை மருத்துவமனைக்கு அனுப்பி வைத்தனர். பாதிக்கப்பட்ட பெண்ணின் புகாரின் பேரில், தாக்குதலில் ஈடுபட்ட அந்த மூன்று நபர்கள் மீதும் கடுமையான சட்டப் பிரிவுகளின் கீழ் வழக்குப்பதிவு செய்யப்பட்டு தீவிர விசாரணை முடுக்கப்பட்டுள்ளது.

தர்ம நியாயத்தைப் பேணி, நேர்மையாகத் தொழில் செய்ய நினைத்த ஒரு பெண் மீது நடத்தப்பட்ட இந்த அநியாயத் தாக்குதலுக்கு அப்பகுதி வணிகர்களும் பொதுமக்களும் கடும் கண்டனம் தெரிவித்து வருவதோடு, குற்றவாளிகளுக்கு மிகக் கடுமையான தண்டனை வழங்கப்பட வேண்டும் என்றும் வலியுறுத்தி வருகின்றனர்.