சென்னை ஆழ்வார்பேட்டை பகுதியில் உள்ள பிரபல ஸ்பா ஒன்றிற்குச் சென்ற திரைப்பட நடிகை வினோதினி, அங்குத் தான் அணிந்திருந்த 15 பவுன் எடையுள்ள தங்கத் தாலிச் சங்கிலியைத் தொலைத்துள்ள சம்பவம் பெரும் பரபரப்பை ஏற்படுத்தியுள்ளது. கடந்த ஜூலை 7ஆம் தேதியன்று மசாஜ் சிகிச்சைகாகச் சென்ற அவரிடம், ஊழியர்களின் அறிவுறுத்தலின் பேரில் தாலிச் சங்கிலியைக் கழற்றிப் பாதுகாக்க வழங்கியதாகக் கூறப்படுகிறது. அந்தச் சமயத்தில் தனது கணவரின் உறவினர் மறைந்த செய்தி தொலைபேசி வாயிலாகக் கிடைத்ததால், அவசரத் துக்க நிகழ்வுக்குப் புறப்பட்டுச் சென்ற அவர், பதற்றத்தில் அங்கிருந்த நகையை எடுக்க மறந்துவிட்டதாகத் தெரிவித்துள்ளார் .

இதனைத் தொடர்ந்து இரண்டு நாட்கள் கழித்து மீண்டும் அந்த ஸ்பாவிற்குச் சென்று தனது தாலிச் சங்கிலியைக் கேட்டபோது, ஊழியர்கள் முன்னுக்குப் பின் முரணான பதில்களைக் கூறியதுடன், அப்படி எந்த நகையும் தன்னிடம் ஒப்படைக்கப்படவில்லை என மறுத்துள்ளனர். இதனால் கடுமையான அதிர்ச்சியும் மன உளைச்சலும் அடைந்த நடிகை வினோதினி, உடனடியாக இது குறித்து மயிலாப்பூர் காவல் நிலையத்தில் அதிகாரப்பூர்வமாகப் புகார் அளித்துள்ளார். துக்க நிகழ்வுகளில் பிஸியாக இருந்ததால்தான் தாமதமாகப் புகார் அளிக்க நேரிட்டதாகவும் அவர் தனது விளக்கத்தில் குறிப்பிட்டுள்ளார்.

இந்தச் சம்பவம் குறித்துக் காவல்துறையினர் வழக்குப் பதிவு செய்து தீவிர விசாரணையில் ஈடுபட்டு வருவதோடு , சம்பந்தப்பட்ட ஸ்பாவில் உள்ள கண்காணிப்பு கேமரா  பதிவுகளை ஆய்வு செய்து வருகின்றனர். இதற்கிடையே, தன் வாழ்வில் நடந்த இந்த மோசமான அனுபவத்தைச் சமூக வலைதளங்கள் வாயிலாக வீடியோவாக வெளியிட்டுள்ள நடிகை வினோதினி, பொதுமக்களிடையே பெரும் கவனத்தை ஈர்த்துள்ளார். பிரபலங்களின் பாதுகாப்பிற்கே இதுபோன்ற இடங்களில் உத்தரவாதம் இல்லையா என்ற கேள்வியை எழுப்பி வரும் நெட்டிசன்கள், இந்தச் செய்தியைத் தற்போது இணையத்தில் தீயாய் பரப்பி வருகின்றனர்.