சென்னை புழல் காவல் நிலைய ஆய்வுக்குச் சென்றபோது தமிழக முதலமைச்சர் விஜய் நாற்காலியில் அமர்ந்து அதிகாரிகளுடன் சாதாரணமாக உரையாடிய நிகழ்வு தற்போது பெரும் விவாதப் பொருளாகியுள்ளது. ஐ.ஏ.எஸ் மற்றும் ஐ.பி.எஸ் உள்ளிட்ட அனைத்து அதிகாரிகளும் தங்களைப் போல எளிய முறையில் மக்களுடன் பழக வேண்டும் என்று நேரடியாகக் கூறாவிட்டாலும், தனது எளிமையான உடல் மொழி மூலம் அவர் அதனை உணர்த்தியதாகப் பலரும் பாராட்டி வருகின்றனர்.

ஆனால், இதற்கு மாறாக நெல்லை மாவட்டம் மானூர் காவல் நிலையத்திற்கு ஆய்வுக்குச் சென்ற மாவட்ட ஆட்சியர் ஆனந்த் மோகன், காவலர்களை நிற்க வைத்துக் கொண்டு விசாரணை நடத்திய விவகாரம் தற்போது புதிய சர்ச்சையைக் கிளப்பியுள்ளது.

ஆட்சியரின் முன்பு அதிகாரிகள் அமர்வதற்காகத் தகுந்த இருக்கைகள் நேர் எதிரே போடப்பட்டிருந்த போதிலும், அவர்களை நிற்க வைத்தே ஆய்வுகள் மேற்கொள்ளப்பட்டிருப்பது பலரின் கவனத்தை ஈர்த்துள்ளது. மழையில் நனைந்த நிலையிலோ அல்லது கடும் பணிச்சுமையிலோ இருக்கும் சக அரசுப் பணியாளர்களை மனிதாபிமான அடிப்படையில் அமரவைத்து விசாரிக்கலாமே என்ற கேள்விகள் தற்போது எழுந்துள்ளன.

முதலமைச்சர் விஜய்யைப் போல அதிகாரப் பகிர்வில் எளிய அணுகுமுறையைக் கடைப்பிடிக்க வேண்டும் என்பதே பொதுமக்களின் எதிர்பார்ப்பாக உள்ளது என்றும், உயர் அதிகாரிகளின் இத்தகைய நடவடிக்கைகள் மாறுபட்ட கருத்துக்களை உருவாக்குவதாகவும் விமர்சிக்கப்படுகிறது.

ஆட்சியார்களின் நடவடிக்கைகள் எப்போதுமே அடிமட்டக் காவலர்கள் மற்றும் அதிகாரிகளிடம் எத்தகைய தாக்கத்தை ஏற்படுத்துகிறது என்பது குறித்து சமூக வலைதளங்களில் அனல் பறக்கும் விவாதங்கள் நடந்து வருகின்றன. மரியாதை செலுத்துவதற்கும், சக மனிதர்களை எளிமையாக நடத்துவதற்கும் உள்ள வித்தியாசத்தை அரசியல் தலைவர்களும் அதிகாரிகளும் உணர்ந்து செயல்பட வேண்டும் என்று சமூக ஆர்வலர்கள் கோரிக்கை விடுத்துள்ளனர்.

“>

 

அரசு நிர்வாகத்தின் ஒவ்வொரு அடியும் பொதுமக்களால் உன்னிப்பாகக் கவனிக்கப்பட்டு வரும் தற்போதைய சூழலில், இந்த இருக்கை விவகாரம் இணையத்தில் பேசுபொருளாகியுள்ளது.