தமிழக சட்டப்பேரவைத் தேர்தல் நெருங்கி வரும் வேளையில், அரசியல் களம் மிகப்பரபரப்பாக மாறியுள்ளது. இன்று சென்னை அண்ணா அறிவாலயத்தில் முதலமைச்சர் மு.க. ஸ்டாலினை நேரில் சந்தித்த தேமுதிக பொதுச்செயலாளர் பிரேமலதா விஜயகாந்த், திமுக-வுடனான தனது கூட்டணியை உறுதி செய்தார். விஜயகாந்த் மறைவுக்குப் பிறகு தேமுதிக எடுக்கும் மிக முக்கியமான அரசியல் முடிவாக இது பார்க்கப்படுகிறது. குறிப்பாக, ராஜ்யசபா சீட் உள்ளிட்ட பல்வேறு வாக்குறுதிகளின் அடிப்படையில் இந்த மெகா கூட்டணி உருவாகியுள்ளதாகத் தகவல்கள் தெரிவிக்கின்றன.
இந்தத் திடீர் திருப்பம் குறித்து சட்டப்பேரவைக்கு வந்த அதிமுக பொதுச்செயலாளர் எடப்பாடி பழனிசாமியிடம் செய்தியாளர்கள் கேள்வி எழுப்பினர். வழக்கமாக அதிரடியாகப் பதிலளிக்கும் அவர், இம்முறை மிகவும் சுருக்கமாக, “சட்டப்பேரவைக்குச் சென்றுவிட்டு வந்த பிறகு பதில் சொல்கிறேன்” எனக் கூறிவிட்டு அங்கிருந்து சென்றார். அதிமுக கூட்டணியில் தேமுதிக இணையும் என எதிர்பார்க்கப்பட்ட நிலையில், இந்தத் திடீர் மாற்றம் எடப்பாடி பழனிசாமி தரப்பிற்குப் பெரும் சவாலாகவே கருதப்படுகிறது.
