நிழல் உலகக் குற்றச் செயல்களை மிஞ்சும் வகையில், அமெரிக்காவின் கலிபோர்னியாவில் ஒரு தாய் தனது 9 வயது மகளையே கொடூரமாகக் கொலை செய்த சம்பவம் பெரும் அதிர்ச்சியை ஏற்படுத்தியுள்ளது. கலிபோர்னியாவைச் சேர்ந்த அந்தப் பெண், தனது மகளைத் திட்டமிட்டுச் சுட்டுக் கொன்றுவிட்டு, சடலத்தை அண்டை மாநிலமான யூட்டாவின் பாலைவனப் பகுதியில் வீசிச் சென்றுள்ளார்.

மேலும் நீண்ட தேடுதல் வேட்டைக்குப் பிறகு, குண்டு துளைக்கப்பட்ட நிலையில் சிறுமியின் சிதைந்த உடல் கண்டெடுக்கப்பட்டது. ஒரு தாயே தனது சொந்தக் குழந்தையை இவ்வளவு கொடூரமாகக் கொலை செய்ததற்கான காரணம் குறித்து போலீஸார் தீவிர விசாரணை நடத்தி வருகின்றனர்.

இந்த விவகாரத்தில் குற்றம் சாட்டப்பட்ட தாயைக் கைது செய்துள்ள காவல்துறையினர், அவர் மீது முதல் நிலை கொலை வழக்குப்பதிவு செய்துள்ளனர். இது ஒரு திட்டமிட்ட படுகொலை என்பதை உறுதி செய்துள்ள அதிகாரிகள், யூட்டா பாலைவனத்தில் சிறுமியின் உடல் கண்டெடுக்கப்பட்ட இடத்திலிருந்து பல்வேறு தடயங்களைச் சேகரித்துள்ளனர்.

பிஞ்சு என்றும் பாராமல் ஒரு சிறுமிக்கு நேர்ந்த இந்தத் துயரம் அமெரிக்கா முழுவதும் பெரும் சோகத்தையும் கொந்தளிப்பையும் ஏற்படுத்தியுள்ளது. நீதிமன்ற விசாரணையில் இந்தத் தாய்க்கு மிகக்கடுமையான தண்டனை கிடைக்க வேண்டும் எனப் பலரும் சமூக வலைதளங்களில் குரல் கொடுத்து வருகின்றனர்.