பாகிஸ்தான் சூப்பர் லீக் 2026 தொடர் தொடங்குவதற்கு இன்னும் சில நாட்களே உள்ள நிலையில், 8 முன்னணி வெளிநாட்டு வீரர்கள் இத்தொடரிலிருந்து விலக முடிவு செய்துள்ளதாகத் தகவல்கள் வெளியாகியுள்ளன. ஆஸ்திரேலியாவின் ஜேக் ஃப்ரேசர்-மெக்குர்க், ஸ்பென்சர் ஜான்சன், ஜிம்பாப்வேயின் பிளெசிங் முசரபானி மற்றும் வெஸ்ட் இண்டீஸின் குடாகேஷ் மோட்டி உள்ளிட்ட வீரர்கள் பல்வேறு காரணங்களுக்காக விலகியுள்ளனர்.

மேலும் பாதுகாப்பு அச்சுறுத்தல்கள், தனிப்பட்ட காரணங்கள் மற்றும் ஐபிஎல் தொடரில் விளையாடுவதற்கான வாய்ப்புகள் போன்ற காரணங்களால் இந்த வீரர்கள் தங்கள் முடிவை எடுத்துள்ளதாகக் கூறப்படுகிறது. குறிப்பாக, ஆஸ்திரேலிய கிரிக்கெட் வாரியம் தனது வீரர்களுக்குப் பாகிஸ்தான் பயணிக்க வேண்டாம் என அறிவுறுத்தியுள்ளதும் இந்த பின்னடைவுக்கு ஒரு முக்கிய காரணமாகப் பார்க்கப்படுகிறது.

இந்த வீரர்களின் திடீர் விலகல், குறிப்பாகப் புதிய அணிகளான ராவல்பிண்டி மற்றும் ஹைதராபாத் கிங்ஸ்மென் போன்ற அணிகளுக்குப் பெரும் கவலையை ஏற்படுத்தியுள்ளது. ஐபிஎல் தொடருடன் பிஎஸ்எல் மோதும் நிலையில், பல வீரர்கள் அதிக வருமானம் தரும் ஐபிஎல் தொடருக்கே முன்னுரிமை அளிப்பதாகத் தெரிகிறது.

எனினும், பாகிஸ்தான் கிரிக்கெட் வாரியம் இந்தத் தகவல்களை மறுத்துள்ளதுடன், போட்டித் தொடர் திட்டமிட்டபடி மார்ச் 26 அன்று தொடங்கும் என்றும், அனைத்து ஏற்பாடுகளும் சரியாக உள்ளதாகவும் உறுதிபடத் தெரிவித்துள்ளது. வெளிநாட்டு வீரர்கள் விலகல் தொடர்பான செய்திகள் வதந்திகளே என்றும், லாகூரில் நடைபெறவுள்ள தொடக்க ஆட்டத்தில் நடப்பு சாம்பியன் லாகூர் கலாண்டர்ஸ் அணி விளையாடும் என்றும் வாரியம் தெரிவித்துள்ளது.