கள்ளக்காதல்கள் இந்தியாவில் குடும்ப வன்முறைகள், விவாகரத்துகள், தற்கொலைகள், கொலைகள் போன்ற பல துயரச் சம்பவங்களுக்கு காரணமாகி வருகின்றன. கணவனையும், குழந்தைகளையும் பெண்கள் கொல்வது போலவே, மனைவியையும் ஈவிரக்கமின்றி கணவர்கள் கொல்லும் சம்பவங்கள் அதிகரித்து வருகின்றன. இதற்கிடையில் திருப்பத்தூர் மாவட்டத்தில் நிகழ்ந்த கொலைச் சம்பவம் பலரையும் அதிர்ச்சிக்குள்ளாக்கியுள்ளது. திருநெல்வேலியை சேர்ந்த அல்போன்ஸ் (35), பெங்களூரு கே.பி.அக்ரஹாரம் பகுதியில் மிக்சர் கம்பெனி ஒன்றை நடத்தி வந்தார்.

அந்த கம்பெனியில் 19 வயது பவன்குமார் மற்றும் அவரது 17 வயது தம்பி பணிபுரிந்து வந்தனர். பவன்குமாருக்கும் அல்போன்சின் மனைவி சத்யாவுக்கும் பழக்கம் ஏற்பட்டது. காலப்போக்கில் இந்தப் பழக்கம் கள்ளக்காதலாக மாறியது. இது குறித்து 4 மாதங்களுக்கு முன் தெரிந்த அல்போன்ஸ் அதிர்ச்சியும் கோபமும் அடைந்து பவன்குமாரையும் அவரது தம்பியையும் வேலையிலிருந்து நீக்கினார். பவன்குமார் மற்றும் அவரது தம்பி திருப்பத்தூர் மாவட்டத்தில் பாட்டி வீட்டில் தங்கியிருந்தனர்.

ஆனால் பவன்குமார் இல்லாத உறவை சத்யா ஏற்க முடியாமல் தொடர்ந்து அவருக்கு போன் செய்து தனிப்பட்ட முறையில் சந்தித்து வந்ததாக கூறப்படுகிறது. இதை மீண்டும் தெரிந்த அல்போன்ஸ், மனைவியிடம் கடுமையாகத் தாக்கியுள்ளார். இதையே சாக்காக வைத்து சத்யா போலீசில் புகார் அளித்ததுடன் விவாகரத்தும் கோரியுள்ளார். பவன்குமாருக்காக தன்னை விட்டு பிரிந்து செல்ல மனைவி முடிவெடுத்ததை அறிந்த அல்போன்ஸ் உச்சக்கட்ட ஆவேசமடைந்தார்.

இதையடுத்து மனைவியின் கள்ளக்காதலனை உயிருடன் விடக்கூடாது என முடிவு செய்த அல்போன்ஸ் நண்பர்கள் 3 பேருடன் சேர்ந்து ஜோலார்பேட்டையில் பவன்குமார் தங்கியிருந்த பாட்டி வீட்டை கண்காணித்தார். முதலில் பவன்குமாரின் தம்பியை கடத்தி வைத்து பவன்குமார் எங்கே இருக்கிறார் என்று விசாரித்தனர். நேற்று முன்தினம் பவன்குமார் பாட்டி வீட்டுக்கு வந்தபோது, அல்போன்ஸ் காரில் சென்று அவரை சுற்றி வளைத்து கத்தியால் சரமாரியாக குத்தினார். சம்பவ இடத்திலேயே பவன்குமார் ரத்த வெள்ளத்தில் விழுந்தார்.

அக்கம் பக்கத்தினர் விரைந்து வந்து பவன்குமாரை மீட்டு வாணியம்பாடி அரசு மருத்துவமனையிலும் பின்னர் திருப்பத்தூர் அரசு மருத்துவமனையிலும் அனுமதித்தும் சிகிச்சை பலனின்றி அவர் உயிரிழந்தார். இதுகுறித்து குரிசிலாப்பட்டு போலீசார் வழக்கு பதிவு செய்து தீவிர தேடுதல் வேட்டையில் ஈடுபட்டு, அல்போன்ஸ் மற்றும் நண்பர்கள் பாக்யராஜ் (40), பொன்னையா (37), அழகு என்கிற கதிர்வேலன் (41) ஆகியோரை கைது செய்து சிறையில் அடைத்தனர்.

விசாரணையில் அல்போன்ஸ், பவன்குமார் தனது மனைவியிடம் இருந்து ரூ.3 லட்சம் பெற்றதுடன் கள்ளத்தொடர்பை விடவில்லை என்பதால் கொலை செய்ததாக அதிர்ச்சி வாக்குமூலம் அளித்ததாக போலீசார் தெரிவித்தனர். இந்தச் சம்பவம் கள்ளக்காதலின் ஆபத்துகளை மீண்டும் வெளிப்படுத்தி சமூகத்தில் பெரும் அதிர்ச்சியை ஏற்படுத்தியுள்ளது.