இந்திய கிரிக்கெட்டின் ‘வொண்டர் கிட்’ என்று அழைக்கப்படும் 14 வயது இளம் வீரர் வைபவ் சூர்யவன்ஷி, ஐபிஎல் (IPL) பயிற்சி முகாமில் அடித்த சிக்ஸர் ஒன்று மைதானத்தில் இருந்த தண்ணீர் குழாயை உடைத்து சேதப்படுத்திய வீடியோ இணையத்தில் வைரலாகி வருகிறது.

பீகாரைச் சேர்ந்த 14 வயதான வைபவ் சூர்யவன்ஷி, தற்போது ராஜஸ்தான் ராயல்ஸ் அணியின் பயிற்சி முகாமில் தீவிரமாக ஈடுபட்டு வருகிறார். வரவிருக்கும் ஐபிஎல் தொடருக்காகத் தன்னைத் தயார்படுத்தி வரும் அவர், வலைப்பயிற்சியின் போது வேகப்பந்து வீச்சாளர் ஒருவரின் பந்தை எதிர்கொண்டார்.

அவர் அடித்த அந்தப் ‘புல் ஷாட்’ (Pull Shot) நேராக எல்லையைத் தாண்டி, மைதானத்தின் கூரை பகுதியில் இருந்த தண்ணீர் குழாயில் பலமாக மோதியது. இதில் அந்தப் குழாய் உடைந்து மைதானத்தில் தண்ணீர் ஆறாக ஓடியது. இதனைப் பார்த்த பயிற்சியாளர்களும் சக வீரர்களும் வைபவ்வின் பலத்தைக் கண்டு வியப்பில் ஆழ்ந்தனர்.

கிரிக்கெட் மீதான அதீத ஆர்வத்தால், வைபவ் சூர்யவன்ஷி தனது 10-ஆம் வகுப்பு சிபிஎஸ்இ (CBSE) பொதுத்தேர்வை எழுதாமல் ஐபிஎல் பயிற்சி முகாமில் கலந்துகொண்டுள்ளார். இது குறித்து அவரது பள்ளியின் தலைமை ஆசிரியர் கூறுகையில், வைபவ் இந்த ஆண்டு தேர்வில் பங்கேற்கவில்லை என்றும், அவர் ‘ஆப்சென்ட்’ (Absent) என குறிக்கப்பட்டுள்ளதாகவும் தெரிவித்தார். அவர் அடுத்த ஆண்டு பொதுத்தேர்வை எழுத வாய்ப்புள்ளதாகக் கருதப்படுகிறது.

https://www.instagram.com/reel/DU7aLq5jIAk/?igsh=MWo2cTltbGYxM3Bmcg==

ராஜஸ்தான் ராயல்ஸ் அணி தனது சமூக வலைதளப் பக்கத்தில் இந்த வீடியோவை வெளியிட்டதைத் தொடர்ந்து, ரசிகர்கள் வைபவ்வை முன்னாள் வீரர் வீரேந்தர் சேவாக் மற்றும் ரிஷப் பந்த் ஆகியோருடன் ஒப்பிட்டுப் பாராட்டி வருகின்றனர்.

கடந்த 2025 ஐபிஎல் தொடரில் வெறும் 13 வயதில் அறிமுகமாகி சாதனை படைத்த வைபவ், இந்த ஆண்டு சீனியர் வீரர்களின் பந்துவீச்சை எப்படி எதிர்கொள்ளப் போகிறார் என்பதைப் பார்க்க ரசிகர்கள் ஆவலுடன் காத்திருக்கின்றனர்.