கர்நாடக மாநிலம் கலபுரகியில், நீட் நுழைவுத் தேர்வுக்காகத் தயாராகி வந்த 18 வயது மாணவி பாக்கியஸ்ரீ, தனது வீட்டில் தூக்கிட்டுத் தற்கொலை செய்துகொண்ட சம்பவம் பெரும் சோகத்தை ஏற்படுத்தியுள்ளது. பன்னிரண்டாம் வகுப்பு பொதுத்தேர்வில் 92 சதவீத மதிப்பெண்களுடன் தேர்ச்சி பெற்றிருந்த அந்த மாணவி, மே 3-ம் தேதி நடைபெற்ற நீட் தேர்வையும் சிறப்பாக எழுதியிருந்ததாகக் கூறப்படுகிறது.

இந்நிலையில், வினாத்தாள் கசிவு மற்றும் முறைகேடுகள் காரணமாகத் தேர்வு ரத்து செய்யப்பட்டு, மறுதேர்வு ஜூன் 21-ம் தேதி நடைபெறும் என்று அறிவிக்கப்பட்டிருந்த சூழலில், இந்தத் துயரச் சம்பவம் நிகழ்ந்துள்ளது. இந்தச் சம்பவம் குறித்துப் பேசிய மாணவியின் தந்தை ராஜசேகர், தங்கள் குடும்பத்தில் எந்தப் பிரச்சினையும் இல்லை என்றும், தேர்வு தொடர்பாக மாணவி மனதில் என்னென்ன அழுத்தங்கள் இருந்தன என்பது தெரியவில்லை என்றும் வேதனையுடன் தெரிவித்தார்.

இந்நிலையில் யாருடைய தவறையும் அவர் குற்றம் சாட்டவில்லை என்றாலும், நீட் தேர்வு ரத்து மற்றும் மறுதேர்வு குறித்த நிச்சயமற்ற சூழல் மாணவர்களிடையே கடுமையான மன உளைச்சலை ஏற்படுத்தி வருகிறது என்பது சமூக ஆர்வலர்களின் கருத்தாக உள்ளது. இதுபோன்ற கடினமான சூழலில் இருக்கும் மாணவர்கள் மனதளவில் பாதிக்கப்படும்போது, தயக்கமின்றி உதவி எண்களைத் தொடர்புகொண்டு ஆலோசனை பெறுவது அவசியமாகும்.