தமிழக அரசியலில் நடிகர் விஜய்யின் தமிழக வெற்றிக் கழகம் ஏற்படுத்தப்போகும் தாக்கம் குறித்து காங்கிரஸ் எம்.பி ஜோதிமணி தெரிவித்த கருத்திற்கு விடுதலைச் சிறுத்தைகள் கட்சித் தலைவர் திருமாவளவன் தற்போது விளக்கமளித்துள்ளார். வரவிருக்கும் தேர்தலில் விஜய் இரண்டாவது இடத்தைப் பிடிப்பார் என்று ஜோதிமணி கூறியது அவரது தனிப்பட்ட கருத்து என்றும், இதனை மக்கள்தான் இறுதி செய்ய வேண்டும் என்றும் அவர் குறிப்பிட்டார்.

மேலும் தேர்தலுக்குப் பிறகுதான் உண்மையான நிலவரம் தெரியவரும் என்றும், யூகங்களின் அடிப்படையில் விஜய் எவ்வளவு வாக்குகளைப் பெறுவார் என்பதை இப்போதே கணிக்க முடியாது என்றும் அவர் தெளிவுபடுத்தினார். பேசிய திருமாவளவன், விஜய் ஒரு புகழ்பெற்ற நடிகர் என்பதால் அவருக்கு அதிக முக்கியத்துவம் அளிக்கப்படுவதாகவும், ஆனால் அவரை வைத்து தமிழக அரசியல் தலைகீழாக மாறிவிடும் என்ற மாயத்தோற்றத்தை சிலர் திட்டமிட்டு உருவாக்கி வருவதாகவும் விமர்சித்தார்.

இந்நிலையில் தமிழக மக்கள் மற்ற மாநிலங்களைக் காட்டிலும் அதிக அரசியல் விழிப்புணர்வு கொண்டவர்கள் என்று சுட்டிக்காட்டிய அவர், கடந்த காலங்களில் சினிமா கவர்ச்சியால் ஈர்க்கப்பட்டு வாக்களித்தது போல தற்போதைய சூழலில் மக்கள் வாக்களிக்க மாட்டார்கள் என்றும், சினிமா மயக்கம் தமிழக மக்களிடம் பெரிய மாற்றத்தை ஏற்படுத்தாது என்றும் உறுதியாகத் தெரிவித்தார்.