தமிழக பாஜக மூத்த தலைவர் நயினார் நாகேந்திரன் தனது எக்ஸ் (X) தள பக்கத்தில் தமிழக வெற்றிக் கழகத் தலைவர் விஜய்யை நோக்கி மிகக் கடுமையான விமர்சனங்களை முன்வைத்துள்ளார். உத்திரமேரூர் தவெக ஒன்றிய செயலாளர் ராஜேஷ் என்பவரும் அவருடன் வந்த சிலரும், அங்குள்ள அரசுப் பள்ளி ஒன்றிற்குள் அத்துமீறி நுழைந்து, கட்சியின் விளம்பரப் புகைப்படங்களை மாட்டி, ‘ரீல்ஸ்’ (Reels) வீடியோக்கள் எடுத்து விளையாடியுள்ளனர்.

இதனால் அங்கு படித்துக் கொண்டிருக்கும் ஏழை எளிய பிள்ளைகளின் கல்வி நேரம் வீணடிக்கப்பட்டுள்ளதாகக் குற்றம் சாட்டியுள்ள நயினார் நாகேந்திரன், “அரசுப் பள்ளிகள் உங்கள் கட்சியின் விளம்பரக் கூடமா விஜய் அங்கிள்?” என நேரடியாகக் கேள்வி எழுப்பியுள்ளார்.

ஏற்கனவே தவெகவினர் அரசுப் பள்ளிகளில் கேக் வெட்டுவதும், ஆய்வு என்ற பெயரில் ரீல்ஸ் எடுப்பதும் வாடிக்கையாகிவிட்டதால் இதையும் நீங்கள் கடந்து போய்விட்டீர்களா என்றும் அவர் சாடியுள்ளார். தீய சக்தி திமுகவினர் அரசுப் பள்ளிகளில் நாடக முகாம் நடத்தி பிள்ளைகளின் கல்வியைச் சீரழித்த நிலையில், தற்போது தூய சக்தி என்று கூறிக்கொள்ளும் தவெகவினரோ அரசுப் பள்ளியையே நாடக மேடையாகவும் சூட்டிங் ஸ்பாட்டாகவும் மாற்றி வருவதாக அவர் ஆதங்கப்பட்டுள்ளார்.

ஏழை மாணவர்களுக்குத் தரமான கல்வியை வழங்குவதை விடுத்து, இப்படிச் சிறுபிள்ளைத்தனமாக ரீல்ஸ் எடுத்து விளம்பரம் தேடுவது நியாயமா பிரதர் (bro) எனத் தவெக தலைவர் ஜோசப் விஜய்யை நோக்கி நயினார் நாகேந்திரன் எழுப்பியுள்ள இந்த காரசாரமான கேள்விகள், தற்போது தமிழக அரசியல் வட்டாரத்திலும் சமூக வலைத்தளங்களிலும் காட்டுத்தீயாய் பரவி பெரும் விவாதத்தைக் கிளப்பியுள்ளது.