காசாவில் தினமும் இரவு 30 முதல் 40 பேரை குறிவைத்து கொல்ல வேண்டும் என்று இஸ்ரேல் தேசிய பாதுகாப்புத்துறை அமைச்சர் இதமார் பென்-க்விர் கூறியதாக வெளியான தகவல் பெரும் சர்ச்சையை ஏற்படுத்தியுள்ளது. பிரதமர் பெஞ்சமின் நெதன்யாகு தலைமையிலான கூட்டணி அரசில் இடம்பெற்றுள்ள பென்-க்விர், காசா மீதான இஸ்ரேலின் சமீபத்திய வான்வழித் தாக்குதல்கள் குறைந்துள்ளதாகவும் அதிருப்தி தெரிவித்துள்ளார். அவரது இந்தக் கருத்து பாலஸ்தீன ஊடகங்களில் வேகமாகப் பரவி வருகிறது. காசாவில் பொதுமக்கள் உயிரிழப்பு தொடர்பாக ஏற்கெனவே கடும் விமர்சனங்கள் எழுந்துள்ள நிலையில், இந்தப் பேச்சு மேலும் பரபரப்பை ஏற்படுத்தியுள்ளது.

முன்னாள் பணயக்கைதி ரோம் பிராஸ்லாவ்ஸ்கியுடன் நடைபெற்ற பாட்காஸ்ட் நிகழ்ச்சியில் பென்-க்விர் இந்த கருத்துகளை தெரிவித்ததாக கூறப்படுகிறது. அப்போது காசாவில் இஸ்ரேல் மேற்கொள்ளும் தாக்குதல்கள் குறித்து பேசிய அவர், உடனடி அச்சுறுத்தலாக இருப்பவர்களை மட்டுமல்லாமல், வேறு சிலரையும் குறிவைக்க வேண்டும் என்று கூறியதாக தகவல் வெளியாகியுள்ளது. மேலும், ஒவ்வொரு இரவும் 30 முதல் 40 பேரை குறிவைத்து தாக்க வேண்டும் என்ற கருத்தையும் அவர் தெரிவித்ததாக கூறப்படுகிறது. பொதுமக்களை குறிவைப்பது தொடர்பான இத்தகைய கருத்துகளுக்கு பல்வேறு தரப்பினரும் கடும் எதிர்ப்பு தெரிவித்து வருகின்றனர்.

இஸ்ரேலின் முக்கிய அரசியல் தலைவர்களில் ஒருவராக கருதப்படும் பென்-க்விர், அந்நாட்டு ராணுவத்துக்கு நேரடியாக தாக்குதல் உத்தரவு பிறப்பிக்கும் அதிகாரம் கொண்டவர் அல்ல. இருப்பினும், இஸ்ரேலின் தேசிய பாதுகாப்பு அமைப்பு, காவல்துறை மற்றும் சிறைத்துறை போன்ற முக்கிய துறைகளில் அவருக்கு பொறுப்பு உள்ளது. காசாவில் நீண்டகாலமாக நடைபெற்று வரும் போரில் ஏராளமானோர் உயிரிழந்துள்ள நிலையில், போரை முடிவுக்கு கொண்டு வரவும், போர்நிறுத்தத்தை ஏற்படுத்தவும் சர்வதேச அளவில் பேச்சுவார்த்தைகள் தொடர்ந்து நடைபெற்று வருகின்றன. இதனிடையே, இஸ்ரேல் மீது இனப்படுகொலை குற்றச்சாட்டுகள் முன்வைக்கப்பட்டாலும், இஸ்ரேல் அவற்றை தொடர்ந்து மறுத்து வருகிறது.

இதற்கிடையில், காசாவில் போரை முடிவுக்கு கொண்டு வருவதற்கான அமெரிக்காவின் புதிய முயற்சிகளும் தீவிரமடைந்துள்ளன. அமெரிக்க பேச்சுவார்த்தை குழுவைச் சேர்ந்த ஜாரெட் குஷ்னர், ஹமாஸ் அமைப்பின் முக்கிய தலைவர் கலீல் அல்-ஹய்யாவை சந்தித்து பேச்சுவார்த்தை நடத்தியதாக தகவல் வெளியாகியுள்ளது. ஹமாஸ் ஆயுதங்களை கைவிடுவது மற்றும் காசாவில் இருந்து இஸ்ரேல் படைகளை திரும்பப் பெறுவது உள்ளிட்ட அம்சங்கள் அடங்கிய அமெரிக்க ஆதரவு திட்டம் குறித்து பேச்சுவார்த்தை நடந்ததாக கூறப்படுகிறது. இதேவேளை, தெற்கு லெபனானில் இஸ்ரேல் நடத்திய வான்வழித் தாக்குதலைத் தொடர்ந்து ஹெஸ்பொல்லா அமைப்புடனான பதற்றமும் மீண்டும் அதிகரித்துள்ளது.