தமிழகத்தில் 2026-ஆம் ஆண்டு நடைபெற உள்ள சட்டமன்றத் தேர்தலை முன்னிட்டு, அரசியல் கட்சிகள் தங்களது கட்டமைப்பை வலுப்படுத்தும் நோக்கில் மாற்றுக்கட்சியினரை ஈர்க்கும் பணிகளில் தீவிரம் காட்டி வருகின்றன.

இதன் ஒரு பகுதியாக, திமுக, காங்கிரஸ் மற்றும் தமிழக வெற்றிக் கழகம் (தவெக) உள்ளிட்ட பல்வேறு கட்சிகளைச் சேர்ந்த 170-க்கும் மேற்பட்ட நிர்வாகிகள் மற்றும் தொண்டர்கள், அதிமுக பொதுச்செயலாளர் எடப்பாடி கே. பழனிசாமி முன்னிலையில் நேற்று தங்களை அதிமுகவில் இணைத்துக் கொண்டனர்.

சென்னை பசுமைவழிச் சாலையில் உள்ள அவரது இல்லத்தில் நடைபெற்ற இந்நிகழ்வில், புதிய உறுப்பினர்களைக் கட்சித் துண்டு அணிவித்து வரவேற்ற அவர், அதிமுகவின் கொள்கைகளையும் சாதனைகளையும் மக்களிடம் கொண்டு செல்லுமாறு கேட்டுக்கொண்டார். வரும் தேர்தலில் அதிமுக தலைமையிலான கூட்டணி மிகப்பெரிய வெற்றியைப் பெற்று ஆட்சி அமைக்கத் தொண்டர்கள் இப்போதே முழுவீச்சில் களப்பணியாற்ற வேண்டும் என்றும் அவர் அறிவுறுத்தினார். இச்சம்பவம் அதிமுகவினரிடையே பெரும் உற்சாகத்தை ஏற்படுத்தியுள்ளது.